أحنه صدك أقلام مأجوره وسختجيه وما عدنه لا ذمه ولا ضمير..  وما صدكنه ولزمنه بس راسه وجيبه وجيبه وطلعنه أبو سراوي وحجي سعدون الدليمي من طيز الجلب .. وأتهمناهم جزافا بقتل ودهس وأعدام الجلاوزه والخارجين عن القانون بساحة أعتصام الحويجه.. وكل واحد من عدنه كام أيخيط ويخربط وينسج قصص من الخيال اللي يرتبط بأجندات قطريه وسعوديه وتركيه وطلعو خطيه لا المالكي ولا الدليمي من أصدر أوامر مهاجمة الساحه.. لا ومو بس هاي.. طلعت الجثث اللي بالساحه كلها بايته مال تلاثتيام أربعه يعني كبل الهجوم ومتفسخه هماتين .. وأكو بعض المعتصمين خ.... ....  أطلقو الرصاص على نفسهم حتى أحنه أنكول شوفو قوات سوات القبيحه والقاسيه هي من كتلت هاي الناس البريئه والدليل هي مسافة أطلاق الرصاصه جانت كلش قريبه والمعروف عن سوات تسلخ جلد الزمال من بعيد.. وحتى اللجان اللي سواها مجلس النواب والحكومه متوصلت الى نتيجه لان أيريدون أيعرفون شلون ماتو المعتصمين..

زين أذا نوري المالكي ما صدر أوامر الهجوم على ساحة الاعتصام بالحويجه ولا الحجي سعدون الدليمي بلغ كنبر وغيدان..جاه شلون سوات البطله هجمت على ولد الخايبه مثل الذيابه من تهجم على قطيع غنم ولعبت بيهم شاطي باطي.. تره هاي عجيب أمور غريب قضيه.. يا جماعه أفتر عندي الدلكو..أكو جهه غير أبو سراوي والدليمي مسؤوله على قوات سوات الشجاعه.. لحد هنا وكافي ضحك ومسخره بعقول العراقيين .. رتبو سيناريوهات أيصدكها العراقي .. وأذا ما بيكم خير أطلعو للشعب وكولو أي أحنه اللي هجمنه على الساحه ولكم صيرو زلم بس صدك اللي ميستحي يكدر كلشي أيسوي ..وكام واحد يشمر الشغله على الثاني وراح تضيع مثل ما ضاعت هوايه لجان أتشكلت ولا لكينه الخيط ولا شفنه العصفور بفضل أبو سراوي وزمرته الصالحه لان الاوامر بالفعل ما أجتي من القايد العام بس أجتي من سليماني قايد الفرس الايراني اللي هو أشرف ودار العمليه بنجاح.. وأكو هوايه جنود وضباط عراقيين جانو أيشوفون بعيونهم شلون هدت سوات بالساحه أدكول هجمو على اليهود وراح أيشمروهم بالبحر..

وهسه هدؤ بعد هاي المجزره.. بس أكو ناس رايحه وناس جايه للرمادي وصايره بالنعل..والمصيبه دخل على الخط الرفيق ..... .....  واللي أنضرب بالبابوج  صاحب واقعة بطالة المي الفارغه وذوله أيريدون أيحصلون على مكسب جماهيري بالانتخابات المقبله بالرمادي والموصل.. بس الجماهير طلعت أذكى من ذوله الحبربشيه اللي يستغلون الظروف وطلبت من عبد الملك السعدي أيصير المفاوض ويه الحكومه اللي أيمثلها كبير الحراميه عزة الشاهبندر.. وهذا الشيخ مسنود من ..... ..... وهذا الدوى للمالكي.. بس كلشي قابل للتفاوض والغالي اليوم يرخص باجر..

واقعة الحويجه مسؤولية نوري المالكي وسعدون الدليمي وعبود كنبر وعلي غيدان.. هؤلاء الاربعه هم المتهمون وفق الماده أربعه أرهاب لارتكابهم جرائم ضد الانسانيه شملت قتل معتصمين سلميين ودهست وأعدمت أخرين حسب روايات الجرحى وأفلام صورتها هواتف الجنود والضباط الشرفاء من الجيش العراقي أضافة الى رواية محمد تميم الذي كان أخر مفاوض بين المعتصمين في ساحة الحويجه والحكومه.. وعلينه أن لا ننسى من قتل المعتصمين في الفلوجه والموصل والجنود الخمسه في الرمادي أذا أردنا العداله أن تطبق..كول زيزي!!

وما خفي كان أعظم