مصيبة العراقيين الحقيقية ان صدام قتلهم بأموالهم ، وداعش احتلت ثلث وطنهم بأموالهم ، والسياسيين الجدد ضحكوا عليهم وهم بأموالهم وحتى جريمة سبايكر نفذت بهمراتنا واحادياتنا يعني انكتلوا ولدنا وبفلوسنا ... وأعلامنا يچذب علينه وهم بفلوسنا ،، الشرقية تاخذ خاوة من السياسيين حتى ماتفضحهم بفلوسنا والفضائية العراقية سوت المالكي مختار العصر بفلوسنا ..
الاعلام العراقي اعلام لقيط ابن صدفة صعد على ظهر الدبابات الامريكية مثل ماصعدوا حرامية المنطقة الخضراء الفاشلين ،
الطائفية والفساد و الارهاب وانحطاط القيم والثقافة كلها كان الاعلام العراقي بشقيه الياخذ خاوة من فلوسنا واليصنع طغاة بفلوسنا مشارك فعلي بكل هذه الجرائم وجزء من حركة الانحطاط المجتمعية الي مر بيها البلد .
قناة الشبوط الغير عراقية نموذجا ، واللي المفروض تابعة لهيئة مستقلة يشرف عليها البرلمان تحولت لمستنقع لفبركة اكاذيب الحكومة وصناعة الإشاعة الفاسدة ومصنع لسرقة الاموال بمشاريع وهمية ( مسلسلات تدفع بيها ملايين ، وأغاني للكاوليات تدفع بيها الملايين أيضاً وتغطيات حية لحركة رئيس حكومة منقرضة ولايته تدفع بيها ملايين أيضاً وكل هذا الدفع والفساد وانتاج التفاهة بفلوسنا ...! )
قضية سبايكر شلون اتعاملت معها قناة حجي شبوط . اولا طمطمت السالفة وأيام حصول الجريمة كان مراسلها موجود بالقاعدة وصور اجزاء الحادثة وما نطقت بكلمة واحدة خوفا من غضب ولي نعمتها رئيس الحكومة السابق .. وهذا ضد معايير الشرف الانساني والمهني والاعلامي چا انته بمكان ماتسوي سبق صحفي بمؤخرة شمس المصلاوية وهي تردح بوياه بوياه .. وخليت داعش يضحك علينا ، خو طلع خفايا سبايكر وانفرد بيها كسبق إعلامي .
ثانيا من ضج الشارع وطلعت مصيبة سبايكر العراقية استضافت مشعان الجبوري وبعض، قادة عسكرنا اللي المفروض يقدمون للعدالة بتهمة الخيانة العظمى وحولت القضية من جريمة إبادة اهتزلها العالم الى جريمة هروب جماعي لجنود متخاذلين ... يعني شباب سبايكر داعش ذبحتهم والعراقية صورتهم بعد قتلهم مجرمين هربوا من أداء الخدمة العسكرية في المعركة وهي بذلك تبرر قتلهم بطريقة غير مباشرة لأن العراقية من تطلع علي الفريجي ويقسم ان الجنود هاربين ومحد منطيهم اوامر انسحاب ، وهذا عكس شهادة الأهالي الي اتواصلوا وي اهلهم لحد اخر لحظات قتلهم وشهادة الناجين من الحادثة، هذا يعني ان العراقية ارتكبت جريمتين ..! الاولى مانزلت تغطية مراسلها عن الحادثة ببداية وقوعها في تكريت . وثانيا تبنت الرؤية الحكومية الي تحاول تتنصل من المسئولية وترفض اي إشارة لعلاقتها بالحادث بل العكس ضغطت على اهالي الضحايا حتى يسكتون وطلعت المنافق مشعان الجبوري حتى يوهمهم انه يوجد اسرى والحقيقة لايوجد اسرى ولاهم يحزنون لان الأهالي اساسا لم يذكر منهم احد ان داعش فاوضته على اطلاق سراح ابنه او طلبوا فدية منه .
إذن فضائية الشعب تحاول خداع الشعب لحماية رجال الحكومة من المسئولية القانونية بقتل شبابنا بسبايكر وهذه ابشع جريمة إعلامية وإنسانية ترتكبها فضائية الشبوط بحق شهداء سبايكر ... يعني لو مستمرة بالتعتيم عالموضوع هواي احسن من ان تساهم بتجريم شهداء سبايكر ، الشعلة من الغضب الي ولدتها سبايكر بقلوب الشعب هي الي حررت آمرلي .. دماء الحسين هي الي أسقطت دولة بني أمية ، بس لو الاعلام الاموي نجح بقتل الحسين ونجح بالتغطية والتعتيم على قتله ، كان ماكو شي اسمه كربلاء الان .
العراقية للان ماخصصت برنامج عن الضحايا وأهلهم مثل باقي القنوات المحايدة حتى الشرقية المعادية للعملية السياسية هم ذكرت سبايكر بدون ما تسيء لشهدائنا،
اطلب من البرلمان العراقي الموقر واللجنة الخاصة بمتابعة جريمة سبايكر والسيد باقر جبر الزبيدي ان يستضيف عبد الجبار الشبوط وإدارة شبكة الاعلام العراقي ومعرفة الأسباب الحقيقية من هذه السياسة العدائية تجاه جريمة سبايكر ..
واسأل القائد الضرورة علي الفريجي سؤال واحد (( بالله بروح خالتك اذا عندك حقل مال دجاج ماتعرف چم دجاجة بي وچم وحدة بيضت ؟ قائد عسكري مايعرف لا اعداد الجنود الحقيقية ولا اماكن سكنهم ولا شلون طلعوا ولا شلون طبوا ... چا انته خالي يامنعول والدين خلاك قائد ؟
للأسف والله سبب دخول داعش وانتصارها علينه بالموصل وجود هكذا ضباط فاسدين وسرسرية ووجود اعلام مثل اعلام فضائية شبوط التكريتي يحارب داعش بچذب قاسم عطعوط المگصوصي وعلي الفريجي الي حتى صوت ماعنده ووجهة مابي نور ممسوخ
اذا اليقودون البلد هيج خوش واوي وخوش ديچ ...
احمد الياسري
امارة سدني الداعشية
