الانتخابات على الابواب وبدأت الرحلات الفضائيه شرقا وغربا للتوسل بالمراجع العظام من أمريكا وايران والسعوديه وتركيا وحركة المجاهدين الشباب الصوماليه لتجديد الولايه والبقاء على گلبنه وگلب اللي خلفونا وخلفناهم, الى ماشاء الذي استوى عرشه على الماء!!!
رئيس الوزراء كان أول رواد الفضاء بالتوجه الى أوباما, مصطحبا معه 007 العراق حمودي!!
فبطلب من الس آي أي تم نقل العميل 007 حمودي بوند الى غرفة العمليات هناك ليشرف على عمليات التجسس التي قامت بها امريكا على نص العالم!! واحنه نايمين!!
السيد المالكي گال لأوباما شفت حمودي شلون جابلكم صور الكتلونيات وهنه يقنعن حكم مباراة برشلونه وريال مدريد, ماينطي بنرتي لريال؟؟
حسب مصدر بالبيت الابيض, أوباما قال للمالكي أني اشوف لو تشيل وزارة الدفاع ووزارة الداخليه وقوات مكافحة الارهاب وكل هل خرنگعيه (هاي شلون ترجموها من الانكليزي ماادري) وبضمنهم سيادتك, أگول لو تشيلهم وتخلي بمكانهم حمودي مو أحسن؟؟
نص الحوار بين الجدر وقبغه:
المالكي: سيادة الرئيس أريد ابقى رئيس وزراء الله يخلي باجيتك!!
المترجم: شنو باجيتك؟؟ ولك أني اعرف 25 لغه هيج كلمه ماسمعها بحياتي!!
المالكي: هسه مو وكتها بعدين اعلمك شنو يعني
أوباما: لا لا أنت أثول وما تسمع الكلام
المالكي: ليش مو اني صاحبكم ومامخليكم تحتاجون شي, حتى جبتلك ويايه نفرين قوزي على تمن الوصيتني عليهم!!
المترجم: قوزي شنو النوب؟؟
أوباما: گاد بلس يو, بس اني طلبت تبسي بيتنجان
المالكي: مولانا الضاهر هذا اللي ياخذ طلبات الرؤساء, بالمكتب مالتي, شويه غبي, يمكن جبتلك طلب خامنئي بالغلط
أوباما: أند ناو وات وي ول دو, شراح نسوي؟؟
المالكي: ولايهمك أجيبلك تبسي البيتنجان هسه بالطياره
أوباما: أر يو ستيوبد, أني احجي على رئاسة الوزاره؟؟
المالكي: اي دخيلك شويه ماالي خلك وصاير عندي جالي
المترجم: جالي؟؟ هاي لغه لو تطكطك مال جدوره؟؟
المالكي: أي سيد أوباما, أريد ابقى الله يخليك عفيه من صدقه رحتلك!!
أوباما: بس اريد اعرف هل حمير شلون ينتخبوكم؟؟ شنو بداخل روسهم؟؟ هوايه علماء بأمريكا يريدون واحد منهم حتى يشوفون دماغه من شنو مصنوع؟؟
المالكي: ثلاث ترباعهم مطايا وداعتك
أوباما: الضاهر هيج ولذلك ينتخبون واحد منهم!!!
المالكي: لاعاب حلگك!!!!

فاصل قصير:
لاتنسى هذا الاسم رجاءا, (فوريه) الجشعمي, أو فوزيه!! عضو مجلس محافظة بابل والمرشحه للبرلمان القادم!!
تضمن لكم دخول الجنه (معها) وكل شخص على انفراد وتلعب تك گول وياها!!! اذا انتخبتوها
احد الخبثاء يقول احب النقدي اذا تدفعلي هسه انتخب!!
تصوروا تحتاج فد خمسين ألف صوت حتى تدخل للجنه, قصدي للبرلمان
الله يساعدها, ويگلك السياسه سهله!! شلون راح تتحمل بالجنه هلكد ناخبين وناطحين؟؟؟؟
هنا لنك فوزيه تايتانك.