بالتسعينات كنت مقيم بمدينة قم الإيرانية وكان داگني الهبري فقررت اسوي حلقة لتدريس بحور الشعر العربي وأوزان الشعر الشعبي لمجموعة من الطلاب الخليجيين ، الي بعضهم هسه تارسين الفضائيات الشيعية وصاروا مشهورين واني بعدني داگني الهبري .. وفد يوم طلب مني المرحوم والدي ان ادرس احد طلاب الحوزة قواعد لغة وبحور الفراهيدي گالي بوية هذا سيد ياسري واستحي من ابوه .. اجه السيد بلشت وياه شفته مطي ودماغه ميستوعب كتله ولك انته شلون راح اتدبرها اذا انت ماتميز بين الفعل والتفعيلة ،، المهم شلع گلبي فطگيتله بطل سڤن وبوشتله ... ولعل غباء هذا الطالب كان احد اسباب هجرتي لأستراليا ،
بالمقابل كان عندي احد أقاربي من قادة الجيش العراقي دارس بروسيا بالسبعينات بحيت إخوته نصهم حزب دعوة وصدام مچلب بي لخبرته الميدانية بحرب ايران وحرب الكويت وكانت علاقتي بهذا الرجل صميمية وكنت من اگعد يمه اشعر أني طفل لحجم ثقافته وموسوعيته يتحدث روسي بطلاقة كان برتبة عميد بالقوات العراقية الخاصة على مااظن ومتدين جدا وشيعي لحد النخاع .
من رجعت للعراق بفاتحة والدي واگف واذا أشوف موكب وحمايات وگفن گدام الفاتحة ونزل منهن واحد شبهت عليه اجه عزاني وسلم عليه ورتبته العسكرية عالية، رديت السلام عليه بس ماعرفته الا ان ناداني وطلب اگعد يمه ، گالي احمد ماعرفتني؟ كتله ولازغرا بيك سيادة القائد گالي أني صويحبك فلان الچنت تدرسني عربي بقم ،، گتله ها ولك فلان شجابك عالعسكر انته طالب حوزة ؟ گال سالفة طويله ،، طلع مشتغل وي مكتب احد قادة الاحزاب الاسلامية ومزور شهادة ومنطينه رتبه دمج وصاير احد قادة محور الجنوب گالي ابو عليوي تشتغل وياي گتله لا خالي ارجع لسدني لان انتم كلاوچية ماادبرها وياكم ، ضحكنا ومشت السالفة .
بعد ايام اجه زارني صويحبي الضابط القديم وحال الضيم حاله ولازم فايل بيده گالي سيد سمعت فلان صديقك بلكي الله توصي يتوسطلي ارجع للخدمة لان وضعي تعبان والجماعة لغوا رتبتي وفصلوني من الجيش بتهمة أني احد ضباط الجيش السابق وحتى تقاعد ماعندي وعندي عيال واني هم ابن عمك بلكي الله عميد فلان صديقك يحل مشكلتي ولك الأجر والثواب ...
الحقيقة هاي الحادثة اتذكرتها من شفت داعش بالموصل تگود بجيشنا مثل ماتگود قطيع مال غنم ، وعرفت اسباب سقوط الموصل ، من يتحول قادة وخبرات الجيش العراقي الاصليين الى مجادية يتوسلون حتى يحصلولهم لگمة لعيالهم والجانوا دايحين بقم وحارات السيدة زينب همه الي يقودون الجيش فاكيد داعش تعلسنه علس وتخلينة نمشي نسولف وي ارواحنا اذا القائد العام لقواتنا المسلحة حملدار فشلون ندافع عن بوابة الامة الشرقية .
مع تحيات خويلكم ابو عليوي
ابومصطفی ال اچخیور 
04/08/2014 - 05:11
البداية
السابق
