وصلني بالايميل واقدمه لكم كما هو:
طگ بطگ :: كلنا فسدة ياوطن..!
أحمد الياسري
انا بسدني استراليا وعندي صديق چنت اتمشه البارحة اني وياه وكان كلش حامي على الفساد ويسب بالمالكي والسياسين الحرامية ويدعو للعبادي ان يضرب بيد من حديد وينفذ امر المرجعية روحي لها الفداء على گولته ...
گالي ما تمشي وياي بروح جدك لهذا المحل مال حوالات عندي حوالة ، رحنا طلعله الموظف صاحب مكتب الحولات قرابة الثلاثة الآلاف دولار جاياته من العراق گتلة شنو هاي ؟ گال راتبي ، گتلة ماليش ؟ گال مو اني مستشار محافظ فلان وراتبي شهريا يوصلني لهنا.. گتلة بس انت متقاعد وتاخذ ألفين دولار من الدولة الأسترالية .
- گال اي شمدريهم الاستراليين المطايا ..!
- گال وعندي بيتين بالعراق هم مأجرهم واستلم ايجارهم شهريا .. گتلة بس انت گاعد بالهاوسنگ دور الدولة الأسترالية للمحتاجين ليش ما تبيعلك بيت بالعراق وتشتري بسدني ؟ گال قابل زوج ، أخذ ايجار من العراق وگاعد بلاش برأس الاستراليين الزواج ..
- گال انت تدري انا هم سجين سياسي ورواتبي ماشي من جمعية السجناء السياسين گتلة يعني بالسنة قريب العشر الآلاف دولار وانت گاعد ؟ گال الحمدلله ذلك من فضل ربي ..گتلة ذلك من فضل الشيطان !ا
مو من ربك ولَك ناهب العراق نهيبة وتحچي على فساد الفاسدين انت سنويتك قريب ٣٠٠ الف دولار يعني راتبك اعلى من راتب رئيس الوزراء الاسترالي .. يعني من السقوط لليوم خامط ٣ ملايين دولار وشوية ،
- گال اووه راح يصير براسي وطني يا اخي وداعتك مخمسهن ومزكيهن .. گتلة ولَك هو اليبوگ فلوس فقراء وطنه ينقبل منه خمس وزكاة ...
- سويت بحث صحفي على شركات الحوالات العراقية اكتشفت ان قرابة الخمسة وعشرين الف مواطن باستراليا يستلمون رواتب من العراق ومن استراليا وغالبية عظمى بيهم فضائيين مثل صويحبنة...
السؤال ::
هل يعتبر هذا الفعل فساد لو مو فساد ؟؟
زين اذا الشعب كله يخمط شلون راح نساعد العبادي بالإصلاح ومحاربة الفساد ؟
اقترح ان نفتح ملفات الفسدة خارج الوطن وسراق المال العام الي استغلوا نظام دولة الفرهود ويفرهدون ويبچون على العبادي ....
- تشكيل جيش من عراقيي الخارج لمراقبة رؤوس الأموال المهربة من العراق والإبلاغ عنها
عذرا يا عراق كل احنه فسدة...ومنافقين
