الاولى : شكد انقهر على مرية تزوجت عن حب ، و ورة عشرين سنة زوجها يتركها ويبطل يحبها ... شنو ذنبها
الثانية : .......... نظرت الى صاحبتها ثم الى الافق البعيد عبر النافذة ... ثم تناولت وردة قرنفل من القدح وشمتها ورجعتها وارتشفت اخر قطرات الشاي في كوبها ... سكوووت .
الاولى : ه ه ه هي ... وين صفنت مو دا احجي وياج ليش ماتجاوبين .
الثانية : لأن اعرف جوابي ماراح يعجبج
الاولى : ميخالف اريد اسمع جوابج .
الثانية : شنو جان السؤال !؟
الاولى : المرية اللي يبطل زوجها يبادلها الحب وره عشرة العمر ، شنو ذنبها ؟
الثانية : و هو شنو ذنبه !
الاولى : شتقصدين
الثانية : وهو شنو ذنبه ينجبر يبقى مع امراة لايحبها او انتهى حبه لها ... المشاعر امر مو بيدنا .. الحب مو واجبات و حقوق ... يعني نكدر نجبره ينفق عليها او يوفرلها سكن ، لكن ماممكن نجبره يحبها ... الزواج شركة ، مو سجن مؤبد .... اللي يريد ينهي الشركة ينفذ شروط العقد المبرم وينفصل .
الاولى : هذا شلون حچي ، لعد و عمرها اللي انگضى تخدمه وتسهر على راحته ، وجابتله ذرية و ربتهم وفنت عمرهم علمودهم ... كله يروح بالشط !!!!!
الثانية : هاي غلطتها
الاولى : وفوكاها هي الغلطانة ... هذا شلون حجي يا وفاء .. اشو صايرة محامية للرجال ، لعد مو انت تدافعين عن حقوق المرأة ..
الثانية : نعم هي غلطانة ، لانها من البداية كان لازم تعرف ان الزواج شركة قابلة للفض ، وان الحب لا يعني التملك ... عقد الزواج لايخولها ان تمتلك الزوج طول العمر .... فالمشاعر ممكن تتغير ...
لم يطلب منها احد ان تتنازل عن راحتها ، او وظيفتها او هواياتها او حقوقها ... ان احب رجلا او ان احب زوجي لايعني انني اندمج فيه واجعله محور حياتي الوحيد ، هذا يسمى الغاء للذات ... لذلك فانها ستشعر بالمرارة والضياع ان توقف عن حبها او تغير او تركها .
غلطة المرأة انها تعطي قلبها كله لمن تحب ، ولاتبقي منه شيئا لنفسها و للزمن ...
الاولى : يامعودة هذا شلون حجي ... ما موزون ابد ..
حقج تحجين هيجي ، لان انت تحجين كلام نظري لكن لو صاير بيج جان گلبتي الدنيا وفضحتيه اذا عرف وحده غيرج .
الثانية : بالعكس ، كلامي هو كلام عقلاني والمفروض اي امرأة عزيزة النفس تمتلك عزة وكبرياء ان لاتتوسل برجل توقف عن حبها ... كافي هالجمل الغبية ،، مثل : المهم راسه يم راسي بالليل ، او المهم بايت ببيته وجوه نفس السگف ، او يلف ويلف ويرجعلي بالاخير ...... او يله دا يمر بفترة مراهقة ثانية ، يعقل ويرجعلي .
الى متى تظلون بهالغباء وطيحان الحظ .
اللي مايحبني مااحبه واللي مايريدني مااريده ...
صح يمكن انقهر فترة ، ابجي ، اضرب عن الاكل ، اكره الدنيا .... لكن بعدين اصحى وارجع اعيش واكمل ويمكن التقي بحب جديد ..... الحياة ماتتوقف ..
هو يعيش حياته وآني اعيش حياتي ... وين المشكلة .
بس احنا بمجتمعنا ، غالبا المرأة تحب الدراما وتحب تلعب دور الضحية ...
الاولى : لو ادري ما سألت ولا فكيت حلگي .
الثانية : مو كلتلج جوابي ماراح يعجبج .
يله انسي الموضوع واحمدي ربج انت ارملة ... همزين اخذه رب العالمين ولا تاخذه مرية غيرج
