بيبيتي الله يحفظها كلش طائفية
بس طائفيتها من نوع خاص ،
مو طائفية بسالفة السنة والشيعة ولا العرب والأكراد ولا حتى بسالفة عنه وراوة المعروفة
كل مشكلتها إنها ماتحب الراويين الي من بيت سرحان والي يسموهم"سراحنه"....
الراويين عبارة عن أربع عشائر
وبيبيتي ساهوكية متشددة متعصبة متطرفة لساهوكيتها ...
يوميا تسولفلي على الخلاف الأزلي بين العشيرتين والي يمكن بس هي تتذكره
-هذا يا شهده السراحنه چانوا شرانيين حيل ،
اجة جدهم عالخيل كفخ جدنا ووگعه من عالدچة ، واحنا السواهيك يسمونا سواهيك لأن ما نسهى عالغلط ولازم نرده
ورحنا سوينا كونة وياهم تتحاچى بيها التواريخ ،أربعة منهم عنجرناهم واثنين انرضت اركباتهم وخمسة منهم يا شهده اتشاهدوا قبل ما تتشلع "كلث" شعرايات من شواربهم
-والله سباع !
زين بيبي اذا انتوا سواهيك لان ما تسهون عالغلط هم ليش اسمهم سراحنة..!
-بيبي لأن يسرحون بالشر
-بيبي خوب ليش مو مثلكم ما يسرحون عن الغلط !
-لا بيبي اني اتذكر من رحنا عزة بيت أم رعد سألتني وحدة إنتِ منين گلتلها ساهوكية گالت غدي احنا سراحنه ما نسلم عليكم
واني يا بيبي دكيتلج على شعرها ودگ هلس گلتلها غارة الله عليكم يالطائفيين تعلموا من عدنا شوفونا شلون ما نفرق!
-زين دقيقة بيبي دگ الباب اجتي خالة ام نادر جايبتلنا عروگ ودتسلم عليج
-خل تولي هاي سراحنية چنت ناسية وهسة تذكرت گوليلها الحجية ظهرها يون عليها ونايمة
-لا أبد ما تفرقين بيبي!
-يا شهدة يا بيبي اني أحب الشيعة اموت عليهم وأحب المسيح واليهود كلهم عشت واتربيت وياهم "بكي ثري " إلا ذولة السراحنه هم الي دمروا العراق !!!
-انزول عليهم ...
زين بيبي آخر سؤال ..إنتِ چنتي حاضرة من جدهم كفخ جدكم ..؟
-لا بيبي هاي قبل ما اجي للدنيا بخمسة وسبعين سنة !
- ها وگلتيلي هم الي دمروا العراق ؟
-اي شلحيتي شگد لجوجة يمكن بيچ رس سرحاني انتِ ...!
- لا والعياذ بالله
وانت تقرا المحادثة وانت مو طرف بيها
أكيد اكتشفت...
ان "المسميات" احنا الي نحورها على مزاجنا بحسب ما يروق لنا ويخدم مشاعرنا
وأكيد عرفت أن أي "عركة" آنية أصلها من زمن لم يحضره جد جد جدك هي مسببة" للضحك "
وأكيد حسيت وياية أن دمار الوطن هو شماعة برگبة كل من "نخالفه"
إذن احنا مدمنين على أوهام الخلاف والإختلاف واحنا بعز شبابنا ووعينا..!
وما يطلعنا من السخرية الي عايشيها إلا مبدأ تقبل الآخر....
افتح الباب احنا العزيزين
