العراق تايمز ــ منقول من الـ "فيسبوك"..
هاي ب 2009 جنت بالاعدادية وعندي صديق اسمة امير جان ضخم حيل وصوته خشن وشكله مرعب كل سنه يختارونه بمحرم ياخذ دور الشمر بالتشابيه..
قبل 10 محرم ب 3 ايام كلي ليش متجي تمثل ويانة والك اجر وثواب وحته الموكب مالتنه يحصل جوائز ويختارونه بتمثيل فلم ومدري شنو...
طبعا اني اطرش بالزفه كلشي ما اعرف من قصه المقتل
ف وافقت ورحت وياه نتدرب بمنطقه حي اور ساحه جبيره كالو راح ننطيك دور بسيط لانك بعدك جديد راح نحطك وية صاحبك امير مساعد الشمر بس تلزم الحصان مالتة وين ميروح تروح وراه كتلهم سهله والله تدربنا ضبطنا الدور كله
اجه يوم العاشر من محرم هالحجي قبلها بايت ليله ابيت صاحبي ولبسوني الزي مال اعداء الامام الخوذه نازله عله عيني والسروال عريض والقميص رداناته طوال يعني طالع فزاعه بالضبط
والساحه جانت محوطيها بسيم وورة السيم العالم تتفرج هواي وسماعات جبيره بيها المقتل مشغلين
المهم ساعه 8 الصبح وصلنا للساحه وجانت شتا والكاع مطينه
بدت المعركه اني مثل الاثول ماعرف وين اروح لان جان الشمر (صاحبي امير) كاعد بالخيمه ف كالولي روح يم النهر اوكف حتى تمنع الممثل الي ماخذ دور الامام العباس (ع) من الماي...
جانو 4 واكفين واني صرت الخامس طبعا النهر عباره عن مسبح مال اطفال ولافينيه بوصله سوده اجه الممثل دياخذ الماي واحنا عود نمنعه كلما نتقرب منه نريد نضربه يشمرون علينا طوابيك العالم ونرجع وهو خطيه ينتضر نكتله اخر شي اجه واحد ضربه براسه ووكع ف انقتل
وصلت المعركه للنهايه بقى بس الممثل مال الامام الحسين (ع) طلع يحاربنا واحنا حاصرناه تقريبا 15 واحد الى ان انقتل
اجه دور الشمر صاحبي طلع من الخيمه بس صدك جايب الدور الكواد ولابس احمر وفوك راسه ريشه وصاعد عالحصان ... اني رحت اركض عليه عود الزمله الحصان وجان انجبح بنص الطيانه والعالم كلها كامت تصيح هااااااا هووووو هييييييي شور بيك الامام ... اني كملت لزمت الحصان وصاحبي كعد فوك الممثل الي ماخذ دور الحسين (ع) حته يذبحه وهو يحجي بصوته العصبي وجان يكص راسه ف خلص المقتل وشغلوا الاذان النسوان كامن يلطمن والشياب يبجون يعني صدك منظر مخيف صار مدافع وكع السيم .... وطبت العالم علينا تركض صاحبي كلي اشرد صارت صدك اني ما ادري بالسالفه ضليت لازم الحصان وواكف وجهي فالت مبتسم عبالي راح يبوسوني يشيلوني ويهوسون بيه قسم راحوا ع صاحبي امير يركضون وراه واني اشو اجاني واحد يركض عبالك قاتل ابوه صفكني شكل عجل طارت الخوذه 3 مترات اني اتعجبت كتله ليش ابن الكلب شمسويلك شو هذا زركني دفره وكاموا يصيحون عليه افلت ما افلت اني ركضت والجزمه جبيره ذبيتها والسروال بلا حزام كام ينزل اني لازمه واركض والله طلعت من الساحه والدمعه بعيني واني كلشي ما اندل بحي اور ضليت اتلفت ولابس الزي الاكشر وحافي طلعت عالشارع ااجر تكسي محد يوكف اخر شي وكفلي واحد كتله دخيلك بس طلعني منا كلي خيرك كتله والله هستوني كاتل الحسين وراجع والعالم اسلمتني دفرات.....
هذا شو تفل عليه وكلي انعل ابوك لابو اليوصلك انزل يلا
رجعت للساحه ادور عله صاحبي والله لكيته خاتل ابيت هيكل كلي تعال خلي تروح العالم ضلينا ل12 خاتلين لحدما بدلنا ملابسنا ورجعنا ههههههههههههههه جان يوم مينسي رجعت للبيت مطين وخدي وارم ابوية كلي ها وين جنت شنو هالطيان كتله والله شاركنا بمعركه الطف وجنت وية الكفار بس احنا الي خسرنا ههههههههههههه..
