ابنها هو البطل النقيب الطيار احمد محمد حسين ..
اللي قاتل دفاعا عن العراق بوجه داعش.. قتل منهم من قتل .. وجرح من جرح ..
الى ان سقط بطائرته الـ مي 35 بالارض اللي مسيطر عليهه العدو ..
واختفى الى اليوم بعد ان تحطمت طائرته ..
هاي الام طلبت ان اكتب عن ابنها .. واللي كتبته ما يوفي حق البطل ..
لمن جئن معزيات بفقدان الطيار البطل .. عسى ان يكون حيا اليوم ..
ـــــــــــــــــــــــــــــــــــــــ
امشي ردّن ..
لا تعزن ..
ابني شمرة حيد من يركب سرجهه ..
و لاتلبسن ثوب الاسود ..
ابني كبرة نار لو نيرانه وجهه ..
و شتوزرن ؟
بطني جابت تاج فوك الراس اشيله ..
بطني جابت صكر يتكلب شراره ..
لو يمد عايل جفوفه اعله الجديلة ..
ابني شمس بليلة الظلمة الطويلة ..
ابني جنح الفوك صدره ..
مهرة تتبختر اصيلة ..
ابني نجمه الفوك جتفه ..
كل طرف من عدهه يلمع سيف.. ويهلهل صليله ..
ابني بيريته عراق ..
الصكر من فوكاهه يفرد ..
جنحه لو جت بينه عيله ..
ابني لو يركب مهرته ..
بيده سمتيته جهنم ..
اببرد كانون وجحيله ..
ابني نجمه وفوك تلمع ..
يم كمرمن عدهه دنك ..
خجل و اختل منه حيله ..
ابني سالوفة امعرس ..
عاف ليليته ويه حبه ..
وسولف الهه اعليه ابليله ..
ابني ريحة جنه عطره ..
من يرد البيته نازل ..
و عاف عد الباب خيله ..
ابني توصل حدر جتفه اجبال ..
لو كام اعله حيله ..
ابني سمتيته التفكده ..
لو تأخر ..
ما تحب غيره بكلبهه ..
و تظل عالمدرج عليله ..
ابني لو يركبهه " جاكم " ..
صاحت العدوان منه ..
و اليظل كدامه ويله ..
ابني ابابيل اعله داعش ..
يرمي نار الله بجفوفه..
ما يظل ابرهة وفيله ..
ابني يضحك من يحارب ..
ومن يرد ينزل يكلهم ..
موش عجبتني الحصيلة!
- "انته كاتل كوم منهم ..
-"لا قليلة!!".
ابني ردة روح طلته ..
و ابني ياخذ روح من جت منه عيله ..
ابني من طاح الف نخله ..
دنكت لاجله سعفهه ..
و ثار من مي دجلة سيله ..
ابني من طاح الف حلوة ..
عافت الماتوا من ارجال القبيلة ..
ودكت و جرت شعرهه ..
وكصت العينه الكصايب و الجديلة ..
ابني يوم الطاح بيهه ..
ما وكع من عد مهرته ..
وطاحت وياه الاصيلة ..
امشي ردّن ..
لا لتبجن ..
ابني من هدومه اخذن..
خيط ..
منهن علك شدن ..
ابني احله ورود يم كنتوره حطن ..
ابني راية هالعراق اعله السرير ..
النام فوك افراشه رفعن ..
حزن لاماعدنه ذبن هالسواد ..
ابني بس ميلاد عده ..
وما اله نهاية وحداد ..
هلهلن .. خليه يسمع ..
مثل ما هلهل عتاده ..
وعيد سواه العتاد..
ابني (وين البطل) صاحوا ..
يوم الينادي المناد ..
افتحت باب البيت يمه ..
بلكي كالوا يوم .. عاد !
#رسلي_المالكي
6 عبور 1 هجرية
6كانون ثاني 2016 ميلادي
