استراليا بلد من اهم ثرواته الحقيقية هو تعدد ثقافاته واعراقه ولغاته ، يعني مدينة سدني على سبيل المثال عبارة عن عالم مصغر ،، اذا تريد تزور الصين وفيتنام تروح لمدينة كبرماتا غرب سدني تلگه العگاريگ الكيلو بدرهم وريحة الزفر تعط تگول تفتر بالصين ، اذا اشتاقيت للروشة وشارع الحمرة تروح لبنگستاون تلگه الفتوش والتبولة صايرات رمز من رموز المدينة ، خو مدينة فيرفيلد مدينة المليون گهوة عراقية حتى المالكي طالب بدمجها للباب الشرجي .. واذا اشتاقيت للعصر الجاهلي ماعليك الا زيارة منطقة لاكمبا وراح تشوف فيلم الرسالة بس بي سيارات ..... مدن وثقافات العالم كلها في استراليا من دون ان يطلب منهم واحد ان يغيرون ثقافتهم او يتركون اديانهم ، اني أولادي بالمدرسة الحكومة مخصصتلهم معلمين خاصين يدرسوهم الدين الاسلامي ،وفوگ هذا كله شيوخنا يخمطون فلوس هاي الدولة ومتنعمين بخيراتها وقوانينها المحترمة ورعايتها ويصيحون دولة كفر ،
استراليا لا دولة دين ولا دولة كفر ولا دولة فكر سياسي استراليا دولة تعددية ديمقراطية ، القانون بيها هو الملك وبقية افراد الشعب هم رعايا القانون ، اذا رئيس الوزراء اندگ بيك تشعل والديه بالقانون . لذلك مرات يستغرب البعض من انگول إحنا مواطنين أستراليين عباله جاي نفيك بس الحقيقة ان قانون الدولة يجبرك ان تكون مواطن غصبن عليك حتى لو متعرف كلمة من لغة البلد او تاريخه ، همه يردونك كما انت أملح واجگم وخشمك كيلوين ، لان هاي الدولة جعلت التنوع والتعددية ثروة لنقل كل خبرات العالم إلها والاستفادة من كل طاقاتهم لخدمة المجتمع والدولة .. واذا اكو واحد يكول ابو عليوي شبيه من الصبح ناگز علينه اگولة اقوى دول العالم واكثرها تطور هي الدول التعددية ( امريكا ، كندا ، استراليا) وليش أنروح بعيد اسرائيل دولة تعددية متطورة جدا وقوية .. بينما شوف الدول الأحادية حتى لو عدها ثروات تبقى متأخرة ( الدول العربية ) التنوع بيها كان موجود سابقا بس التوحد الديني قتل التعدديات الثقافية .. كويظم صاحبي البارحة چان هذا موضوعي صفن عليه
گالي سيد بروح جدك ماتمد ايدك وتتفلي على ظهري ذكرتني ... گتلة خير شبيك .. گال والله ياسيد يمكن عندي تعددية نخاعية هي مو نفس هاي التسولف عليها ....!
گتله أنت تريدني اتفل على ظهرك حتى تطيب ؟ گال اي بخت جدك انشالله ..
گتله .. تف عليك وعالخلفك .. طيب انشاالله يكويظم..
