بدمعتين ... أهتزت حتى حواجب بان كي مون وشوارب ابو العيطة !!
چا اشمالها ادموع امهاتنا ما ألها شرّاي ؟؟
دمعة امهاتنا حتى أكبر من حدود العراق .. أمهاتنا تبچي للفلسطيني وللسوري .. وللمصري .. وللبحريني ... وحتى للهندي !!
دموع امهاتنا تتحدث بكل اللغات .. بس عيون العالم وكحة وگصصهم ما تعرگ !
أمهاتنا فطيرات أگـلوب يبچن حتى على عدوانهن !
وحده گـرايبي بچت على منتوف اللحية صدام لما شافت الأمريكي يحسّب بگـملاته !!
_ ها أم راضي .. شو بچيتي على منعول الوالدين .. شنهي تحبينه ؟؟
_ لا والله يا ابو مروة .حاشاك إمداه وأُمدا اليحبه ... بس بچيت على الزلم من تذلها عدوانها ! ! چا أبن الچليب لا يعرف يشيل إيد .. رجل .. على هذا المصلبخ اللي يفلي بگـملاته ؟!
النايبة ڤيان الدخيل چانت مچلبة بشروال كاكا مسعود .. حسبالها شيروال الكاكا صمام امان إلها ولمشيخة ابوها لحد ما إنگطعت اللاستيكة وبانت العورة !!
مع ما هاي _ على گولة خالد العبودي _ هم احسن من الملايات مالاتنا !!
وحدة خلصتها علينه .. اربع إسنين بس تبغج : السيد القائد ... السيد القائد !! والثانية .. ثمان سنوات وزدناها أربع ٍ ما عدّها سالفه غير دولة رئيس الوزراء .. !!!
ولچن عاد أتعلمن من سعدية الزيدي .. من امينه رزق وشوفنّا دمعة .. بس دمعة لخاطر أطفال تلعفر .. لعجايز آمرلي .. لشباب سبايكر !!
يامن طرگاعه الطاحت عليچن وعلى عيارتچن ياعيارات !!!
