ابو خميس چان يتمشه وي الذيب وگاطعهم الجوع يدورولهم على واحد ياكلونه ، كظولهم واوي رادوا ياكلوه الواوي كلاوچي گالهم شراح تستفادون اذا اكلتوني اني مابيه كيلوين ، گالولة چا اشلون ؟؟ گالهم اني اجيبلكم صيد ، الواوي راح قشمرله مطي وطلي ودجاجة ودعبلهم على الجماعة .. بعد ان تشكر منه السبع والذيب قرروا يتقاسمون الغنايم .. السبع گال اني رجال ديمقراطي خل يقسم الذيب .. الذيب صدگ وبلش بالجسمة ، گالة المطي حصة الاسد والطلي حصتي والدجاجة حصة الواوي ..هاج عليه الاسد ولطشة بالگاع مات الذيب بالمكان ..! التفت ابو خميس عالواوي گالة اني رجال ديمقراطي انت قسم .. الواوي حشاش گالة المطي الك غدة والطلي هم الك عشة والدجاجة باچر الصبح تتريگ بيها .. ارتاح الاسد على هاي القسمة گالة ولك يالواوي منو علمك على هاي الجسمة الزينة ؟؟ گالة الواوي العلمني هالمنعول الوالدين المشلوخ زرة .... 
هسه خوية يالتحالف الوطني اعتبروني الواوي وخل اقسملكم غنايم الحكومة وافض الطلابة وقسمتي كالاتي .. 
رئاسة الوزراء لحمودي خو مو تگولون ماعليه قبول .. والنائب الاول ابو حمودي خو مو ولاية ثالثة الرجال نائب ؟ والنائب الثاني نسيب حمودي ابو رحاب زوج بنت ابو حمودي .. 
بروح ابيكم شلونها قسمتي موش معدلة يبعد خالكم وبدون طلايب وداعش واگفة على روسنا وفضوها يغاتي 
مو جسمتكم صارت جسمة الواوي وابو خميس ...
تحيات خالكم ابو عليوي

• عرفان مزيف ..! متى تنتهي الرحلة الحجتية للشيخ ( ابو هدى الغزي)
• طگ بطگ :. المنبر الحسيني الوائلي والشيرازي :.
• طگ بطگ :. دليل الفكر الشيرازي وأثره على التشيع !!
• بكاء بوزن الفضيحة والذل
• Tag btag طگ بطگ