هسة واحد يگول لي هالايام حاط گورَك وي الوزراء ! طبعاً بالمناسبة كلمة ( گور ) فارسية مأخوذة من كلمة ( قبر ) وحاط گورك وي فلان يعني مثل ما القبر ماينتقل من مكانه انت گاعد لفلان ركبة ونص . المهم .
فد يوم دخل سيد رياض محمد سعيد الحكيم للدرس و هذا سيد رياض الحكيم من الله كان كلش يحبني وكلش احبة من دون بيت الحكيم . گعد حتى يبدي الدرس وگعدو الطلاب واني بقيت واگف ، گال : تفضل استريح گلت له ما اگدر سيدنا تعذرني ! تعجب السيد وگال : سلامات متعور أو فد شي ؟ گلت له : والله سيدنا كنت بس مريض رحت للعيادة وطلعت مريض ومتعور وتعبان ! گال : هذي شلون رهمتها ! گلت له : كان بالعيادة مضمد اسمه عدنان أو هيچي شي خوش يضرب أبر ودائماً اذا اتمرض امر عليه بسرعه آخذ أبرة وينتهي كل شي ! اليوم رحت للعيادة لگيتهم جايبين بمكان المضمد طبيب اسمه عامر حسان ما ارتاحيت لشكله گال اضربك الأبرة گلت لا مستعجل أخذت أبرتي وطلعت، بعدين تندمت ورجعت لأن ماكو غيرها بس مستوصف أمير المؤمنين الخيرية، خليته ضربني الأبرة ، وانشلت صفحتي كلها بحيث اجيت من العيادة للمدرسة ادفع بماطوري حتى ما گدرت اسوق وهسة اذا گعدت بعد ما أگدر أگوم من مكاني وانت بكيفك ! شبع ضحك وگال روح ادفع ماطورك وارجع لبيتكم .
