روحي ..
ولا تكـَلها اشبيج ، وانته الماي :
مكـَطوعه
مثل خيط السمج روحي .
حلاوة ليل محروكـَه حركـَ روحي .
وعتبها اهواي ما يخلص عتب روحي .
و لا مريت ، ولا نشديت ، ولا حنيت .
وكـَالولي عليك اهواي ياثلج اللي ما وجيت .
وعودان العمر كلهن كـَضن ويّاك .
يا فيّ النبع واطعم : عطش صبير ولا فركـَاكـَ .
تعال بحلم واحسبها الك جيّه
واكـَولن جيت .
ودخول السنة من الكـَاك يا ثلج اللي ما وجيت .
ولا استخطيت ولا وعديت
ولاطارش جذب وديت ،
ولامره شلت عينك تعرف البيت .
ولامريت ، ولا نشديت ، ولا حنيت .
وكـَالولي عليك اهواي
يا ثلج اللي ما وجيت .
عُـمر وتعدّه التلاثين ، لا يفلان :
عُـمر وتعدّه وتعدّيت ، لا يفلان .
واغمّض عود ، أجيسك ياترف :
تاخذني زخة لوم .
وأكـَلك ليش وازيت العمر يفلان ،
يفلان العمر يشكـَر ، ولك يفلان .
ورحت براي ، وجيت براي :
حسبالي سنة وسنتين وتلاثة ، وأشوفك ذاك البكـَلبي
وأضوكـَك ماي .
ولامريت ، ولانشديت ، ولا حنيت .
وكـَالولي عليك اهواي
يا ثلج اللي ما وجيت..
