ابو تمّام, الشاعر _ يعتبروه من المجددين في الشعر العربي , بل يذهب البعض الى اعتباره اول المجددين ,من خلال التأسيس لما بعد المعنى وفي تشذيبه للمفردة والصورة التي تنتجها وفي الاستعارات باعتبار ( الاستعاري في قلب الميتافيزيقي ) على رأي هيدجر وريكور ,لاحقا. هسه احنه شعلينا بهالسوالف, ابو تمام فد يوم طالع يتأمّل ويستنشق هوا نقي بالصحراءلان الوْلاية مخنوكَة بدخان معامل الطابوكَ والمجاري طاكَة وجواكيج السمكرية تشتغل, ومترندح على ذيج الفرس اللاكدة على بحر الخبب , والدنيا مالامّته, ومايشوف الا واحد يصيح عليه : ياابا تمام ,يااباتمّام,التفت وركّز زين لكَاه اعرابي على بعير .كَاله ها شتريد؟ كَاله عمتَ مساءً , ابو تمام كَاله هله هله بالسبع.. كَاله اني ماافتهم شِعرك, كلش ماافتهمه , ابو تمام وبهدوئه المعروف عنه غلّس , فأردف الاعرابي : وهذه مشكلتي الاولى والاخيرة , مدمرتني ومخليتني ماانام الليل ولا استلذ بكَعدة ولا سالفة , هنا ابو تمام اشّر للفرس بايده , وكَفت بمجانها,كَاللها ابقي هنا لاتتحركين, هي هم صدكَ ولا تزحزحت ,فرس معدّلة ,عود سيارة واحد من اصدقائي ,نوكَفها يم جريدة طريق الشعب ورا نص ساعة نرجعلها نلكَاها يم بربر اغا, يابه انت جارّ السايد بريك يكَول ولكم اي جريته جا بعد وين اجرّه قابل اخذه وياي؟ المهم ابو تمام راح للاعرابي مد ايده على ركَبة البعير وطكَها ,البعير نوّخ . ابو تمام مد يمناه على ياخة الرجل وعتها عتتين ( اللي اعرفه ماكو ياخات قبل بس الرواية هيج تكَول) ويسراه طوى اصابعها بس السبابة لا , وحطها كَدامم عيون الاعرابي وكَاله : انت مخبّل لو تريد تخبّلني؟ ولك ماتفتهم شعري هاي عاتي عاتي ميهمني بثولك, بس مال تخلي هاي المشكلة الاولى بحياتك لاعمي لا , ولك الحياة بيها الف شغلة وشغلة ممكن تخليها من اولوياتك , ولك هاي حياتك يبن الناس لاتدمرها باشياءات غيرك , ماتفتهم بالشعر يااخي عوفه منو عاتب عليك.. ولك رووووح عييييش , وعافه ورجع لفرسه , الاعرابي صاح وراه : لكن يااباتمام........
هنا ابو تمام رفعله ايده من فوكَ جتفه وافردله الوسطى وصرخ بيه:
Go, get a life man,real one, go God damn it وصعد فرسه وراح طُربكَ طُربكَ طُربكَ.
هسه شاهِدنا , عليمن جنا نسولف؟ والله نسيت
حطوا شاهدكم انتم, اكيد عدكم إعرابي , عالاقل واحد
ثيمالاه
