ارتبطن بالخدود اسلاك واشتعلن على الذرة
يالخدودك اشيوعيات اعيوني أمن تتحرة
(( مقطع من شعر الملة ))
الشاعر العراقي الكبير محمد علي القصاب كان سيد الحشاشين بلا منازع واحد مبتكري الشعر الفكاهي والغزل بالذكر كان يسمى ابو نؤاس الشعر الشعبي ( علاوي نور عيوني ياعلاوي ، وحبيبي امك متقبل من احاچيك ) وغيرها لدرجة ان السمعة الي لزگت بأبو خالد بسبب قصايد الملة ، احد رفقاء الملة اكدلي ان الملة كان شاعرا موهوبا بالحلة وكل ماقيل عن علاقته بالفروخ هي عبارة عن نكت وتحشيشات يخلقها الملة للضحك ليس لها علاقة بالواقع ... الملة كان يمتلك صوت جميل وقدرة على التلحين تأثر سعدي الحلي بألحانه وطورها في بداياته لانهما كانا من رواديد المنبر بالاصل قبل ان يذهب سعدي لإذاعة بغداد، وكانت النكتة لا تفارق الملة حتى على المنابر .. يسولفون ان الملة كريم عين فد يوم كان يقره عالمنبر وشاف شاب حلو فوگف گدام الشاب واحد اسود حجب الرؤية عن الملة وهو تك عين فقطع القصيدة وحاول يبعد الاسود ويحرك الناس لكن للأسف اجه الاسود أيضاً وگف بينه وبين الشاب وحجب الرؤية . الملة ضاج كلش التفت عالاسود گاله عمي ليش تكفر بالله مو انت بمجلس الحسين ؟
خالي واشتغلت عليه البوكسات وطلعوا من المجلس سحل الولد يحلفلهم ان الملة چذاب محد صدگة شلون يچذبون الملة ويصدگونه شبع طن كتل المسكين ،
سالفة الملة بعزة الحلة هاي شفتها هواي قريبة على سلوكيات احزابنا الحاكمة الان همه حرامية ماكلين مال الله وعباد الله والوادم شافت اول عمليات سبي بتاريخ العراق بزمنهم وهمه خدام الحسين والمدافعين عن التشيع واليوگف گدامهم يكفرونه لان يحجب الرؤية عن المناصب الحلوة والفلوس واذا نگوللهم بوية يواش ولكم ديمقراطية انطونا مهلة خل أنشوف دروبنا ، گالولك انت ضد التشيع !! چا ولكم التشيع تفرهد وخمط وفشل وملايين النازحين والقتلى ؟؟
الف رحمة على روحك الملة جنت تخلق التحشيش حتى تضحك الوادم مو تضحك عليهم ، وعزه الحلة چان يوم يومين ويخلص بس عزانا وي حرامية المنطقة الخضراء يمته يخلص ؟؟
