عدّل بنطاله بكلتا يديه وهو يجوب ارجاء المكتب الطويل ويدير رأسه كمروحة ارضية فاقدة للتوازن، ذلك بعد ان فقد من وزنه نحو 10 كليوغرام خلال الاسابيع الاخيرة التي تلت المظاهرات، ولم تعد هناك بناطير تناسب مقاساته...

رن الهاتف النقال على غير عادته بصوت عال "جذاب جذاب جذاب جذاب..":

-       الووووو، نعم.. تفضلوا

-       ابو اسراء وياك... شلونك ابو يسر

-       هله خويه هله بالحجي ابو اسراء، شنو كلما اخابرك تطلع وحده تسولف بالفارسي، خو ما اتزوجت عجميه...

-       لا خويه بالزيارة بقم.. زرنه واندعينالكم، هسه شفت التلفون داگ عليه شكم مره...

-       اگلك يمعود اتورطنه وروح ابوك "كامل" وروح ابوي "جواد"، هل ورطة الما تخلص مال المظاهرات، وانوب يردون اصلاحات، والمرجعية تعال سوي اصلاحات، شلون بالله باصرني ابو اسراء..

-       يمعود هاي سهله

-       اي بروح والديك انت صاحب خبرة ومفتح بالسبح وتندل كل دروب الموامنه والحملات وصارت عندك تجربه طويلة...

-       انت غشيم مصلحة ابو يسر، بمثل هاي السوالف تطلبلك فد 100 يوم وتجددلك فد 100 يوم، وانوب تطگلك اثنين ثلاثة من جليلين (قليلين) الذنوب، وبعدها تطلعلك سالفة جبيره تلتهي الناس بيها، وماتشوف لن الاربع سنوات خلصت...

-       والله خوش سالفة هاي، ما خطرت عله بالي، بس عود اگلك تره انا اليوم طگيتكم بالدهن كلكم نواب الرئيس ونوابي وشمرتها عل البرلمان وما اتصور تمشي!! ابو اسراء ابقه ابقه وياي علخط بروح ابوك، هذا اوباما جاي يتصل بس لا صاير شي...

-       الووو مستر اوباما.. هو آر يو، شلونكم.. مس كاترين شلونها، العيال، انشالله بخير...

-       هلو مستر عبادي، ماشي الحال نشكر الرب، زينين، شخبارك انته ايگولون گابه عليك للضالين، شكو شراح تسوي..

-       والله مستر اوباما، انا بعد لازم اضر طووووووووووووووو...

-       مستر عبادي، انا سديت خشمي شتريد تسوي، بروح العزاز عندك..

-       الخط جاي يگطع من يمنه، اگلك اريد اضرب بيد من حديد، حسب ما گالت المرجعية..

-       اها يعني انشالله مستر عبادي راح تفلش الحكومة كلها، وبيمن بلشت انشالله!!

-       والله بلشنه بالنواب مال الريس ومالتي ووديتها للبرلمان، اخوك انا هم تعلمت مالات المالكي، وخل البرلمان والتظاهرات ينجازون!!

-       والوزراء مستر عبادي، شخبارهم، راح تطيرهم لا... اهم شي مستر الجعفري شخباره؟

-       والله مستر اوباما شگلك، هذا اخونه الجبير، وعيب زحمه، والرجال يعاتبنه عنده سكر وضغط، وساعة ويطلع المارد من القمقم وتعال يعمي رجعه، ومعجون الحكومة مستر اوباما مو من طماطة الزبير، لذلك تحس النظرة الكونفشيوسية بدأت تتلاشى كمحسوس نوعي، وعليه يوجب الانفتاح بحجم الانتفاخ على معايير الجوار الجغرافي الذي يستدعى حدود المعقول الى المنقول والمقبول والمسقول...

-       واضح واضح الظاهر تعلمت هندي هل اليومين... زين مستر عبادي، شيل كاك هوشيار زيباري، شتگول؟

-       ليش مستر اوباما مو انته زلمه زين وگليط وجبير اخوتك، تعرف هذا الوحيد الاگصر مني بالحكومة، من اشوفه ترجعلي الثقة بنفسي، وخاف اذا طلعته انوب يتفيكون عليه كلهم طوال، اشوفها واگفة مستر!!

-       زين شنو رأيك تطلع وزير الدفاع مستر العبيدي وتخلص منه وجيب مكانه "گاطع الركابي" مثلا؟

-       عند اهلنه مثل مستر اوباما يگولون اذا نجمعت مصيبتين ابيت واحد ينهجم، وانه رجال اخاف الله، هسه هم طلعنه نسيبه وابن عمه اثيل، وهسه اريد اطلع نسيبه اسامه، شخلينه لداعش يا خويه مستر اوباما.. الرحمة هم بيوتفووووول!!

-       والله شگلك ابو يسر، ما إلها غير تقيل وزير الداخلية وتخلص منه؟

-       لا حرام مستر اوباما، يزعل ابو مهدي المهندس، وعيب والرجال استوه جاي يكون نفسه، قابل تريده يرجع يغسل صحون ابلووووندووون!

-       مستر عبادي انا دخت وياك انته تريد اتطلع منو معناها، طلع مستر عبدالمهدي!!!!

-       ما هگيتها منك مستر اوباما، عفه اي والله عفه... فوگ ضيم الله على الرجال انا اطلعه، هو خل يطلع رگبته يمعود وانوب اطلعه، لا رگبه ولا وظيفته، تريده ايضل على راتب التقاعد 57 مليون بالشهر بس شلون يعيش بيهن، وهذا سيد ويشور بينه، وكافي كاك مسعود والاكراد يحبونه ايده خفيفه بالتواقيع احنه ابخت جده...

-       مستر عبادي، غير دوختني انته؟ طلع جماعة التيار الصدري وفكنه؟

-       اصبرلي بس اشويه مستر اوباما... بس تجيني گصگوصة من السيد..

-       زين طلع مستر صولاغ، وخل قرارك الظهر مستر عبادي حته لا يگول دبر بليل ويزعل مستر عمار؟

-       هذا عمود الوسط يل شايل الحكومة... شلون طلعته هذا.. هذا امن اركان النيبه مستر... هذا سوبرمان الحكومة، البارحة مثلا انكسر ميز بمجلس الوزراء هو گام لحمه، ذاك اليوم خربت صوبه بالامانة العامة صلحها، ماطور يعطل يسويه، السود والبيض الي بافريقيا الجنوبية من تعاركو منو صالحهم... هو، والرجال يشتغل (ست البيت) سبع صنايع وطياراتنه گامت تحط بابراج الحمام عله گد ما كثرن والوادم يوميه تطرّش علينه بس تعالوا بس تعالوا، ا گول بالمناسبة اخوي مستر اوباما عود احجيلنه ويه اوربا خل يقبلون طيارتنه تطير يمهم.. زحمه!!

-       مستر عبادي وروح ابوي "حسين" وروح ابوك واروح "حسين الشهرستاني" الي يسوه گونداليزا رايس وعندي بمعزة جورج واشنطن الله يرحمه ويرحم والديكم، انته حقيقة واقعا راح تضر........ حد...حد.. يد، طوووووووووووووو

الو الو... الو مستر اوباما، بس ردت اسولفلك عله "مدحت المحمود" وينك، اشو ما سألت عله وزير الكهرباء اخوي ابو سمره.. يمعود...

-       الوووووو ابو اسراء بعدك وياي عله الخط... اوباما زعلان ولازم اضرب بيد من حديد عيب بعد.. اذا حصلتلك ايد من حديد بدربك حته لو نص عمر، مال ضربة وحده.. اخوي اخوي..

-       ابو يسر تظل غشيم العمر كله شوفلك مسيحي.. افتر على النسوان وزارة المرأة، اذا اكو تركماني... طگهم واحسبها إصلاحات شبيك...

وتعالى صوت الهاتف "جذاب جذاب جذاب جذاب جذاب..."، فرد وهو مفزوع من نومه: الو الو منو وياي..

-       انا وياك شبيك بس لا بعدك نايم لسه، گالو لسه نايم من رجعت من مجلس الوزراء لسه، شنو هذا مجلس وزراء لو اقراص منوم ابو الحاجب...

-       اي والله جنت حلمان اگلج شصار... زحمه انگطع ويه المالكي ونسيت اگله يجيبلي وياه علگ من الزيارة وساهون... واوباما هم يمكن خلص رصيده ما رجعت خابرته...

-       ها شبيك اسم الله انته بس لا ما تغطيت زين وما حطيت حرز السيد الجعفري جوه راسك هل طلعلك المارد... اسم الله.. اسم الله...