صاحِبنا العراقي...
مستعد يدفع ثلاثين ألف..
ديغسلوله و يدهنوله و يلمعوله و يبولشوله و يعطروله سيارته.
و فوگاها...
أكيد راح يلح، إلا ينطي إكرامية خمستالاف بخشيش.
و بنفس الليلة..
الطبيب يشخصله إلتهاب الكلى مال بنته..
و يكتبلها علاج..
و ينقذ حياتها.
و تدري شراح يسوي صاحبنا؟
راح يستكثر الثلاثين ألف على الطبيب ..
و راح يحاربه..
و راح يطالب بالحد من جشع الأطباء..
و بعدين يروح للحلاق كل أسبوعين، و يصرف ربع مليون بالسنة على شعره و لحيته..
و ثم لازم يتذكر يبچي على الفقير، بين فترة و فترة..
و هو فلس ما طلع من جيبه بمساعدة الفقير على أجور المعاينة.
الطبيب الغالي الدجال الجشع الموزين، مو سر..
معروف غالي و دجال و جشع و موزين..
و مع ذلك، جنابك تروحله..
و بعدين، تجينا و تشتكي.
يعني الصوچ صوچك..
لأنك إنت رحتله برجلك..
و هو ما جبرك تروحله..
و كذلك صوچك..
لأنك تشجعه و تروحله.
لا تروحله..
و من عساه يفلس و يعزل..
و إخصم الحچي.
و اللي يگول الطب مهنة إنسانية، و الطبيب لازم يصير إنساني..
تره هذا مو معناته تجبر الطبيب بالغصب يصير إنساني..
الإنسانية رائعة، لأنها شي طوعي من عندك، مو غصب على غيرك.
إذا تشوف الإنسانية نادرة، تبرع للفقير فلوس المعاينة..
و صير إنت إنساني، من جيبك و على حسابك..
و هذا شي عظيم و بديع..
لأنه طوعي، و لأن محد جبرك تصير إنساني.
و كذلك...
لما تشوف جوعان فقير..
تشيل من جيبك و تنطيه، علمود ياكل من المطعم..
مو تروح تجبر أبو المطعم ينطيه أكل ببلاش..
على أساس هايه إنسانية، و تريد تغصب أبو المطعم على الإنسانية.
الإنسانية الطوعية، ماكو أحلى منها.
الإنسانية بالغصب، ماكو أقبح منها.
لا تجيلي تتحجج بحجة الفقير، علمود تنزل أسعار الأطباء و إنت تستفاد.
شيل إنت من جيبك، و ساعدهم إنت، و لا تتبرمك بفلوس غيرك.
و الطبيب اللي يريد يساعد، يساعد بكيفه، مو غصبا عنه.
أكو مستشفيات حكومية بلاش..
بس الناس تتجنبها، علمود لا تموت..
الذنب، مو ذنب الطبيب..
الذنب، ذنب الحكومة..
نفس هذوله الأطباء العراقيين، يصيرون أعظم أطباء بالخارج..
لكن الحكومة العراقية تبوك المليارات مال النفط، من جيوبكم..
علمود تسويلكم طب مجاني.
المفروض..
الحكومة العراقية تبيع المستشفيات، و تنطيكم فلوسها..
و تنطيكم فوگاها كل رواتب الأطباء و الممرضات و الموظفين..
و راح تشوفون البوك و السرقة و الفساد يختفي رأسا..
و تصير عدكم فلوس كافية و زايد، تفتصلون بصحتكم..
و تأمنون يم شركات التأمين على علاج السرطان و العلاج المكلف و العمليات الغالية.
من وره ما قريت التعليقات على الأطباء..
ما كنت أتوقع هيچي حقد على الأطباء بالعراق..
فلذلك..
هاليوم قررت مستحيل أرجع أمارس بالعراق..
و راح أبدي أحذر زملائي الأطباء بإنگلترا و الخارج، من المصير اللي منتظرهم إذا رجعوا للعراق، من وره روس كل هذوله الحاقدين..
و أراويهم نماذج من التعليقات المسمومة بالحقد على الأطباء.
من وراه هيچ نماذج..
هالچم طبيب اللي بيه خير اللي بقالكم..
راح يعوفلكم العراق..
و يهج لمكان يقدره و يحترمه أكثر من صاحبنا العراقي الحاقد.
و عود بالعافية عليكم العراق..
و أبو علي الشيباني يلوگلكم.
