طگ بطگ لادين له ولا مذهب ولا حزب عمود الفقراء والمعدان تأسس باستراليا قبل تسع سنوات ولا زال العمود الشعبي الذي لم يتوقف في الصحافة العراقية المهاجرة في استراليا .....
بلش بالمالكي بمئات المقالات وآخر مقالة كانت مقالة ( نوري خرق دستوري ) ، نقالات ناقدة لم تنطلق من خلاف شخصي وانما نقد لسياسة المالكي وحكومته المرحومة .. اول لقب يطلقه طگ بطگ على حيدر العبادي ابو قصيرة ومن باب ( من حبك لاشاك ) ، خوية ابو قصيرة برنامجك الحكومي اول شغلة تسويها حل شبكة الاعلام العراقي وتسريح لوگيتها بالگنافذ لانها هي التي وسعت الأزمات بين مكونات الشعب وكانت المطبلة للمالكي افسدت النظام إعلاميا ،ووصيتي الثانية سهلة كلش سهلة كل شغلة رفض يسويها المالكي سويها ( الفيدراليات ، مجلس السياسات الاعلى ، المادة ميه واربعين وحل مشاكل الاقليم .. استقلال القضاء ، عودة الهيئات والمؤسسات المستقلة للعمل المنفصل عنك ، مالك علاقة بالجيش والأمن نهائيا عين وزراء مختصين ، السنة العراقيين دير بالك تخرب وياهم ، رجع مشروع الصحوات واربطه بالدفاع او الداخلية ،، دير بالك من حزب الدعوة لا تخليهم مستشارين لان يضيعونك ، اجتث كل البعثيين الي رجعهم المالكي ورجع كل البعثيين الي اجتثهم .. علاوي استفاد منه ولاتخرب وياه ) .. اذا سويت هاي الامور اختملك بالعشرة راح تكون بطل قومي وراح تصير عبدالكريم قاسم جديد .. واذا مشيت على سياسة المالكي وگمت الچذب فاقسملك بالله السنتين مراح تكملها مو اربع اسنين والسيستاني گاعدلك على الجرف ، وكتلة الدعوة صارت أقلية بالبرلمان يمرعدوك تمرعد .. اسمع مني هاي الرسالة القصيرة وصدقني ماراح تندم يابو قصيرة
تحيات خالكم ابو عليوي
