ماعندي إحصائية لمدينة سدني چم مرة فازت بلقب اجمل مدينة بالعالم بس عندي إحصائية بأجمل مناطق سدني ومدينة (نچرل بي) تعتبر من اجمل مناطق نورث سدني وارقاها ، واليوم عليوي عنده لعبة بهاي المنطقة وغبشنة من الفجر وصار ريوگي بهاي المنطقة الجميلة .. اول ماطگيت فنجان الگهوة أخذت نفس عميق وقريت الفاتحة لام البنين شكر على هاي النعمة ، نعمة العيش باجمل مدن العالم واكثرها جمال وهدوء واستقرار .. بس گبل لا اخلص قراءة فاتحة الشكر اتذكرت مطعم هريسة ابو منتظر الگرعاوي ألي براس شارعنا بحي السلام بالنجف الي مافوتت يوم من ايام سفري بالعراق اذا ما تريگت يمه .. وبديت أقارن بين مطعم نچرل بي وانواع الزهور الي تحيط بي وبين مطعم ابو منتظر وانواع الذبان الي كان يتعارك على مواعينه الصبح .. والحقيقة وواحد يحچي الحچي اليصعد لله من قارنت بين المشهدين جريت حسرة وگلت صباح العافية عليك يبو منتظر وعلى ذبانك لان اشتاقيتلكم كلش واجمل مدن العالم تروح فدوة لصبخاية أهلنا .. واحنا الظاهر وادم معدان غير الصباخ والتراب مايلوگلنه وآخر دعواي ان أفيش يا ريحة هلي .....
صباحكم هريس
