من نفطكم ..ڤلل وقصور انبنت بس موش الكم
خيركم عالغربة فاض ... ونتوا غربة وعايشين بنص وطنكم
خَضره گيعان المدن ومنشنشين
وصبخة لجل الغير لبّستو أرضكم
من نفطكم
اصحوا خوية الناس اِجَت من كل حَمولة وفرهدتكم
أنتو صح للخير سلة
وشِبعت ابطون (اللَعَد) واهل (واليوّلو) من تمركم
ونتو صح أهل الثقافة والفراهيدي
وعروضه وشاكر السياب ابنكم
كلشي عدكم لليجيكم
وما أعرف اشلون أتفَهَّم قصدكم
دوم مفتوح الخِرج لليعتنيكم
.. كلشي عدكم....
كلشي عدكم.. للغريب.. وحصرة للمنكم وبيكم
كلشي عندكم للغريب
بس ابنكم ...لو تعناكم توگفونة على البيبان يتِنَطّر عطفكم
من نفطكم .. كلشي هذا المر علينا
من نفطكم
درسوا بأرقى المدارس من نفطكم
لبِسو بشوت البريسم من نفطكم
دولة الزعران عاشت من نفطكم
سافروا بين الدول ينخون من يفتي بذبحكم من نفطكم
گالو (شروگ) وجنوب ومالكم كل حگ تعيشوا من نفطكم
وراتب اللي شكك بمنبع اصلكم من نفطكم
وفوگ كل هذا الي تنطونة تصيحو إخوان وبطيبة گلب مديتوا چفكم
وفوگ كل المر نسيتوا٠٠ و العفى عما سلف" خربط وضعكم
ولسا ما راضين عنكم
ونتوا صرتوا للوطن كبش الفداء
وهمَ بطراف التنك حزوا نحركم
من نفطكم
لبست هواي الحرير ونتوا يهل الخير محرومين من يوم الشفتكم
كلها ما راضين عنكم صرتوا خبزة دخن للجوعان بس يشبع يذمكم
صرتوا صوت الكل حزب بس ماكو صوت أيريد حگكم
صرتو جبهة الكل حرب لا ناقة بيها ولاجمل شايل حملكم
شلون ...گلولي افتهمكم؟
ليش خليتو الاجة والراح يتفيَّ بنخلكم؟
ليش دوم الباب مفتوحة بوجه مصاص دمكم؟
ليش لسه الماي مالح ونتوا
أصفى الماي يجري من تحتكم
ليش هذا العوز كلة ونتو عيشتو الطوايف من نفطكم
مصعب وحردان ...دكتور وسفير صارو وحكموا مدنكم
چانو بصيف وشتا يتفسحون ... ونتم بكل موسم البصطال ما فارگ رجلكم
ونتوا أهل الكلشي عدكم
مراوح بنفس المكان وحتى شط العرب دايخ من صبركم
خايفين أعلى التأخي والاخوّة وبيدكم حديتو سچين الطعنكم
من نفطكم
اصحو من هذا السبات وگومو علنوها بأسمكم
سدوا بيبان المصافي وخيركم يبقى بأرضكم
گوموا ابنوا الناحطات والشوارع والحدايق والبنايات التسركم
گوموا سوو إقليم شبه المستقل وبخنادق خطو حدكم
واليريد اللحمة والوحدة الخبيثة خلة يلحس من قصعكم
تنتعش لازم مدنكم ....كلة هذاالنفط حقكم .. كلة هذا الخير منكم
كل عمركم عالعرد تتقوتون .. ومن ثگل حمل الذهب كاسر ظهركم
من نفطكم .. من نفطكم
