خلي نمر شويه على سالفة التسويه عود شنو يعني تسويه ? ومع منو تسويه? اذا تريدون تسويه بين طوائف الشعب العراقي كفيلكم العباس اطلعوا منها انتم وثاني يوم تصير اصفى من المي الارو واذا تسوية حروب وتنازلات وارهاصات حروب وكلبكم عالناس مثل ماتدعون ليش ماسويتو تسويه في بداية الأزمة وظليتوا ظامين روسكم وخلف الله عالمرجعيه والحشد الي خلصكم من داعش وتالي تريدون اتاجرون بدمهم وليش ماسويتو تسويه من كانت محافظاتهم بيدهم قبل مايدفع الشعب كل هاي الدماء من كل الطوائف وتالي ترجع تسلم الارض المحررة بالدم لداعش بأي صوره كانت واذا تنازلات بالتسويه زين شراح تنطي انته تنطي الارض الهم والنفط مال الفقره الي سمعو بيه وماشافوه ونص الحكم الي دفعت الناس ثمنه بحور دم وفوكاه دم الشهداء وفتوى المرجعيه ودموع الايتام والارامل والفاقدات وحتى مقبرة الشهداء احتمال يطلبون هدمها. لاتترددون وافقو واضح عدكم كلشي لان انتم ورثتو هذا الشعب والوطن وبكيفكم تبيعون وتنطون وتتنازلون. زين هوه المقابل شراح ينطيك مثلا يوقف التفجيرات؟ وانت شهامك بالتفجيرات شو ماشفنه سياسي مات بتفجير غير شخصين فقط لان اختلفوا ويه امريكا يمكن واذا يكدر يوقف التفجيرات صدك معناها هو الي يسويها المفروض تاخذه تحاكمه اذا هيج لو تكعد وياه بعدين ليش نلف وندور وساعه رايحين لخنجر وساعه لمنجل الخليفه الرجال موجود واقلاها رجال صريح ويحجيها علني مو مثل ذولي الكلاوجيه الكذابين روحو اكعدو وياه وفضوها زين اذا انتو تريدون تبيعونه لداعش وفروخها وتروحون تتمتعون بفليساتكم الي حصلتوهن ليش ماتمشون من هسه وتعوفونه وراح تشوفون اذا الله خلصنه منكم ومن ساعة السوده الي لفتكم علينه شراح يصير بكل هاي النمايم الي طمعتوهم بالناس من وره هاي سوالفكم. عموما شعب العراق ودم الشهداء بعد معادلة الحشد لم يعد للبيع كما كان.