لم يكن يدر بخلد ابو كاظم بياع الفرفوري في بغداد الجديدة ان "القوري" الذي يستعمله لشرب الشاي سيقلب حياته رأسا على عقب.
قبل يومين وبعد ان فتح محله اول الصباح واستعاذ بالله من كل داعش وداعشية جلس ليشرب الشاي من القوري اياه،ولكنه وجد القوري فارغا رغم انه متأكد من وضع الشاي الكسكين فيه، فما كان منه الا ان خضه قليلا ليتأكد من "بقبقة" سائل الشاي الا انه تفاجأ بخروج دخان كثيف من فوهته اعقبه خروج عملاق بدون ساقين يشبه بعض البشر في المنطقة الخضراء.
وسمعه يقول "شبيك لبيك انا بين ايديك، لك مني 7 طلبات قل ولا تستحي مادمت اطلقت سراحي".
صفن بياع الفرفوري قليلا ثم همس لنفسه: خليني اجرب هو انا خسران شي.
قال للعملاق الذي بدون رجلين:
حجي، انا عندي طلبات هواية لكن مادام تريد سبعة بس ماعندي مشكلة:
1-اول طلب اتسويني عضو برلمان غصبا على الجميع ومااريد اي كتله نزاحمني على المنصب البرلماني المعتبر..ولا تكلي انتظر الانتخابات ، ترى خريط بخريط ،صحيح تخرجت من محو الامية السنة الماضية لكن مشيها يالله.
صار.
2-اريد اروح الى سويسرا لعلاج مؤخرتي واعتقد انك تعرف انا اعاني من البواسير منذ سنوات طويلة.
صار.
3-تروح تتأكد هل صحيح اكو حوريات بالجنة لو هذا تلفيق من الجماعة واذا لكيت الحوريات جيبلي وياك وحده على ذوقك الله يخليك.
4-اريدك تحضّر بلم بس يكون جبير وترّكب بيه كل المسؤولين في الحكومة وترميهم بشط العرب.
صار.
5-عمر ابني الجبيرعمره 17 سنة واريده يصير وزير الشباب والرياضة ترى هو يحب الرياضة كلش ولو تشوف غرفته مليانة "طوبات".
صار.
6-اريد كل بياع فرفوري في بغداد يصير لو وزير لو وكيل وزارة اقدم او مدير عام في اي وزارة مناسبة.
صار
7-تاخذ لي صورة الحين وتكبرّها وتنصبها على جدارية جواد سليم وتكتب تحتها عبارة:بالروح بالدم نفديك ياابو كاظم.
صار
اختفى العملاق ولم يعد حتى كتابة هذه السطور.