اكعد عوج واحجي عدل.
واقنعني لمن تنسأل.
عالكرسي مبروك اكعدت.
ونعمت عينك ماشفت.
انطيني بيمن جاهدت .....والموت بيه يستدل.
ياهو البينه مضطهد.
وذب سيفه بالساحه وشرد.
شتريد شحجيلك بعد.....حافظهن اسوالف كبل.
اكعد عوج واحجي عدل..؟
صدام بيه انه ظلم.
والفلت من سيفه سلم.
بعظام اخوتي واللحم.......الكاع شبعت والنمل.
الضال مو مثل المشى.
ماعندي بيت وفلشه.
هم بتت ليله بلا عشه.....والصبح تتريك كتل.
اكعد عوج واحجي عدل..؟
من راسي لجدامي جرح.
مايدي دم يدي ملح.
البيت ماضل بي سطح.......حتى اطرد بصوتي النزل...
معقوله متشوف الجره.
كل شعبي اهله مكدره.
بالناس صارت مجزره......بدم الشوارع تنغسل.
اكعد عوج واحجي عدل..؟
من احجي مابيها زعل.
بس ردتك اسويلي حل.
يوميه نشظه وصل......والشايب انلمه طفل.
هم الي حق مو بس الك.
ما ابقى خايف اسألك.
خير الوطن من يوصلك....بس انته هم هذا عدل.
واعلان مدفوع الثمن.
فتح اعيونك عالوطن.
بعديش نفطات وكضن.....امبارك انطوني بطل.
اكعد عوج واحجي عدل..؟
ظالمني ليش بلا سبب.
خايف اجرحك بالعتب.
انه الي كل عمره انسلب .....وتريدني من احجي بعقل.
احزاب مو واحد الف.
بس خوف ماكو جي عرف.
تسألني شنهي المختلف...؟..بس الملابس والشكل.
وهواي لاكن مهزله.
وردونه لأسوء مرحله.
صار الشغل كلمن اله.........ويكلي لله اشتغل
اكعد عوج واحجي عدل..؟
هسه انه سولفت العلي.
ومنكم شلع غاسل ادي.
الماشفته من والد عدي.......ماعنده بطه للكتل.
مدوم ما دامت لهم.
بس الطمع شال الفهم.
عدنه الله باجر ينتقم......يمهل وابد ماينهمل....؟اكعد عوج وااااااااااااااحجي عدل..
جبار بخيت
