طبعا الكاولية باللهجة العراقية همه الغجر او النور على گولة اخوالنا المصريين والكاولية العراقيين مثل السمچ ماكول مذموم ، لان الزلم الخشنة الهسة گاموا يضربون ركعة ويحچون بالإمدادات الغيبية چانوا للصبح يهزون چتف وي بنات حمدية واذا تضيعهم تلگيهم بالفوار دايحين لذلك ثقافة الكاولية القت بظلالها على سلوك ربيعتنا السياسيين بحيث بيهم هواي متدينين للخاشوگة بس همه بالحقيقة حمدية اشرف هواي من اخياتهم ... المهم سالفتنا من چنت ازغير چنت دائماً اسأل والدي عالحزب الشيوعي العراقي وچان يگولي (( الحزب الشيوعي مثل چلب الكاولية ، بس ينبح ما يعض )) ومن اطلب من السيد يترجملي هاي الجملة يگولي بوسة البعثيين بخمس تيام اخذوا الحكم والشيوعيين گظوا عمرهم يناضلون وماكو قبض مثل چلب الكاولية بس ينبحون ما يعضون ... الحقيقة چنت اتمنى اكون بالعراق الان حتى اسأل السيد عن المالكي مثل يا چلب ؟ لان چلب الكاولية ينبح مايعض
المالكي ينبح عاللوادم ويعض ربعة ، ينبح عالأكراد ويعض اهل الناصرية ، وهكذا وتصريحاته عبارة عن نبيح راح
اسوي وراح افعل وكلشي ماكو همزين مخلفلة جريو زغيرون يقشمر بي العالم يهدة على نمير العقابي ياخذ بي خاوة من جراوة المنطقة الخضراء .. رحم الله الكاولية كل ما اجيب طاري السياسيين العراقيين احس بقيمة شرفهم ....!
