اسف احبتي انقطعت عنكم خلال الفترة الماضية لظروف صحية ولكن قلبي مع العراق وشعبه في مواجهة الارهاب اللي اتمنى نخلص من طركاعته في القريب العاجل يا ارحم الراحمين
سألني صديج كال خالي شنهي رأيك باحدات العراق فاجبته نحن مقبلون على حرب اهلية علنية الوضع في العراق الان يشبه الى حد كبير الوضع في لبنان قبل بداية الحرب الاهلية ...اذا افترضنا ان المليشيات الفلسطينية في لبنان هي داعش الان بالعراق ..الاحزاب العراقية سواء بالسلطة او بالمعارضة ما تختلف هواي عن احزاب لبنان بذيج الفترة
العراق كان يحتاج القدحة واحتلال داعش للموصل هي القشة التي كطمت ظهر البعير ....الصواريخ والاستعراضات ظاهرها ممتاز حالة تعبوية ضد ارهاب قادم للعراق ولكن اذا راحت داعش شلون راح نسيطر على هاي المليشيات الي قوة القانون ما كدرت تهزها والمالكي كظه اربع سنين من حكمه يركض وراهم فما بالك اليوم وقد دخلوا برعاية الدولة وقوانينها لان الجيش لا يستطيع ان يصمد امام داعش بالموصل ...بعد الحساب يمكم خالي
اعلن تضامني مع ابناء شعبي في مواجهة الازمة وانا اول المتطوعين للدفاع عن هذا الوطن بكل ما املك ...لان قلبي عراقي وروحي عراقية ولكن عقلي ما بي حظ دوم يوسوسلي وساس شيطانية
ووسوسة اليوم هي ان العراق مقبل وبدرجة امتياز على انهيار كامل للعملية السياسية وحرب اهلية ظاهرها حرب داعشية وباطنها حرب بين المكونات الرئيسية الثلاث للوطن
انشوفكم اغاتي مع تحيات خويلكم ابو عليوي..
