( الحمد لله )
اگول بكل رضاتي وراحة البال
الحَمِد لله اعلى كل حــــــــــــال
صح هدني التعب وفراگ الأحباب
ولجياّت الفرج مسدودة كل بـــــاب
وصحيح العاشرتهم هسة غيّــــــاب
بس عافوا مهجتي امگطعه أوصال
الحَمِد لله اعلى كل حــــــــــــــــال
بس خلّو جرح ما اگدر أنـــــساه
عليه اتعودت وتعامل اويــــــــاه
كلما يصحى جرحي ويسمع الآه
يطرب چنه يسمع مني مــــــوال
الحَمِد لله اعلى كل حـــــــــــــال
يطرب شامِتّي من يسمع شصار
حيث أيده بثلج واني أيدي بالنار
سوّاني الهجر چن موجز اخـبار
وصرت سالوفة لهل القيل والقال
الحَمِد لله اعلى كل حـــــــــــــال
صرت طيرة وطحت بيد المجانين
وكل واحد وگفلي وبيدة سچـــــين
لا عدهم عقل لا ذمة لا دــــــــين
لكن لبسوهم ثوب عقّـــــــــــــــال
الحَمِد لله اعلى كل حــــــــــــــال
لكن ما صحت مـــــــِن الالم دوم
وما بعت المعزة بساعة السَــــوم
نعم جسمي انتحل من ثگل الهموم
وگلبي شكد رزايا أتحمل وشــــال
الحَمِد لله اعلى كل حــــــــــــــــال
گلبي الماخفگ من ودعتـــــــــهم
ظل يخفگ صلي بس مر اسمهم
يتمنى بألم بلكن تردهـــــــــــــــم
ليالينا العليهه انعقدت آمــــــــــال
الحَمِد لله اعلى كل حـــــــــــــال
ليالي الناس تهجع بيها الگـــلوب
بس آني اختلف والحال مگــلوب
اگظّي الليل چني بطلقة مصيوب
وصبّح منشده والهمّي حمـــــــّال
الحَمِد لله اعلى كل حـــــــــــــال
وصبّح حال نخلة وواگفة تـــــموت
ولا احني الجذع وتوچة عالــــتوت
أهز بيدي السعف لو شامت ايفوت
وَصيرن عاليريد ايضرني حيــــّال
الحَمِد لله اعلى كل حــــــــــــــــــال
وَصيرن نجمة بدروب اليمـــــــرون
عسى الحظ ينعدل لحظة ويحــــنون
يسويها البخت ليلة ويعــــــــــــودون
ويشوفوا اخدوش دمع العين من سال
الحَمِد لله اعلى كل حـــــــــــــــــــال
ويشـــوفوا الروح مشتاگة وحزينة
ورُوَت بـــــدموعها دروب المدينة
وشما ما مر تظل ترفة وحــــــنينة
رغم من النوايب حِملَت اثقــــــــال
الحَمِد لله اعلى كل حـــــــــــــــــال
رغم منهم شفت حسرة وهضيمة
وما خلو بعد للعشِرة قيــــــــــــمة
وحسافة سنيني ضاعت يا حريمة
بس كل معضلة أتمر ولها حلاّل
الحَمِد لله اعلى كل حــــــــــــال
کاظم ال مبارك الوائلي
