في يوم من الأيام وتحت أشعة شمس شهر آب اللهاب حاملا باكورة من ارشيف احدى الجرائد المحلية التي أهداها لي أحد الأصدقاء ومعها كل علامات البؤس والنقمة التي ترتسم على وجهي و((حاط الجكارة صفح)) ،وخلال سيري من شارع الرسول (أحد شوراع المدينة القديمة )) الى المرآب الداخلي (( كل ساعة يجي واحد يكَلي تبيع ؟)) (( اكَله لا ما ابيع )) لو يجي واحد فايخ يكلَي اريد جريدة وحدةحتى اخليهة ع راسي علمود الشمس )) فأجيب قائلا تعذرني ما اكدر انطيك جريدة ، وبعدها إضطررت الى المشي بسرعة أكثر حتى اصل الى المرآب ؛ لأن اشعة الشمس صبت جام غضبها وحقدها عليِِ فأخذ العرق يتصبب مني وقد أخذ التعب مني مأخذه الى أن أمليت ناظري بالطلعة الرشيدة لباب(( الكراج)) .
وتمشيت قليلا ومن ثم ركبت الى السيارات التي تقلني الى الحي الذي أسكن فيه وهنا تكمن الطامة الكبرى( لكيت الركاب عددهم 9 صايرين تبسي من الحر ومنتظرين 5 نفرات حتى يصيرون 14 )) ترددت أصعد للسيارة أو لا ؟ ... أصعد للسيارة أو لا ؟ وبعد التي واللتية قررت الصعود ولكن من سوء طالعي الفلكي جلست بجانب أحد الشيبة المتقاعدين( مخليلة مقواية يهفي بيهة ويسب ويشتم ويكفر من الحر والوضعية الداجة) وأثناء هذه الملحمة جُذبت مسامعي الى جملة قالها هذا الرجل بغضب (( تل ابيب احسن من عدنا واحنا بلد الخير )) هنا إنفتحت قريحتي للكلام (( كتلة حجي هاك هاي جكارة وهدي اعصابك ، انه انطيتة الجكارة لو هوة ابتلى على عمرة الرجال لان حجيتلة من تاريخ نشأة إسرائيل ولحد هذا اليوم وبأختصار ولمدة 3/4 الساعة وروة شوية صعد السايق وشغل السيارة الحجي بعد المحاظرة شديدة الاختصار وتشغيل السيارة ظ هرت عنده بوادر النعنشة الكذابة ومشت السيارة ووصلت نص المسافة .
وبعدها التفت السائق (( وجان وجهة جينكو )) مشرئبا متشائما بائسا ويائسا ((وجهة يكَص الطبر )) كَال لموا الاجرة وبالفعل الركاب انطوه الاجرة وحسب الفلوس وصاح بصوت جعوري منو اللي ما دافع كرورة ؟ كلوله كلنا دافعين سايقنا .. وبعدين حسب الركاب طلع عددهم 11 مو 14 وبعد ان شنفت اذاننا بوصلة من الردح والشتائم والكفر كال منو اللي صاحلي وكلي العبرية صاروا 14 ؟ كلولة الركاب محد كلك انته صعدت وشغلت السيارة وطلعت بينه .... طبعا تتذكرون الشايب المتقاعد جان يهفي بالمقوايه كَلي وليدي مو انته اللي صحت السايق ؟؟؟ كتله حجي خلي الله بين عيونك مو أنه وياك صارلنا 3/ 4 الساعة نتنقاش حتى كثر ما كتلنا الحر اعترفنا أنه وياك باسرائيل دولة !!!
المهم ما طلولهة عليكم قرر السايق ذو الرأي السديد والعقل الرشيد أن يرجع للكراج بعد ما وصلت السيارة نصف المسافة والركاب تعاركوا وياه وهذا ما زاد الطين بلة يعني خاف كان عندة في تلك اللحظة شعور بالذنب قفل بالزايد هاي المرة وبالفعل رجع للكراج ورجع الكروة بعد صراع الخردة الذي إستمر لمدة عشر دقائق
وصعدنا سيارة ثانية وانا صعدت ايضا ... وبأثناء صعودي .الكيت الشايب بوجهي بالسيارة الثانية
كتلة ها حجي شفت الوضعية شلون خربانة هسة بشرفك اسرائيل مو دولة ؟
كال الحجي بنبرة ناقمة : بشرفي دولة ونص !!!
ولكم الأمر من قبل ومن بعد