رغم كل الجراح والمآسي التي يعيشها الشعب من ارهاب وطائفية، وفساد، ووضع اقتصادي متدهور، يطل علينا (الهمام) (السبع) محمد اقبال بقرارات جديدة تقصم ظهر العراقي المسكين الذي لسان حاله يقول (ام حسين كنت بواحد صرت باثنين).
كل القرارات الاخيرة التي صدرت لم تراع مصلحة الطالب واهله، واقصد فرض الرسوم المالية، فمن يريد التنقل من مدرسة الى اخرى عليه دفع (15000) دينار، ولنتصور ان عائلة مهجرة ظروفها القاسية اجبرتها على تغيير محل سكناها اكثر من مرة في السنة ولديها اربعة طلاب يعني يدفعون كل انتقال (60000) دينار، الله يقبلها يا وزير.
القضية ما توقفت عند هذا الحد، القرارات الاخيرة الصادرة عن هيئة الرأي ما خلت شئ بدون رسم مالي، من الاجازة، الى اصدار وثيقة، وراح تضحكون عندما اسولف حتى الاعتراض بفلوس، كل شئ مقابل مبلغ، يعني بس ظل عند الوزير قضية واحدة وهي انه المدرس او المعلم اذا راد يتعين يدفع نصف راتبه كشرط، مو تعبنا اقبال؟
اهم شئ عند الوزير الحلو جباية المال، حتى العبادي يرضى عنه، لان مودة الجباية اصبحت اساس في الحكومة، وعديلة حمود ومحمد اقبال يتعاركون ايهما يستقطع اكثر، لان الحديدة حارة، والتغيير قريب، واذا العبادي ما رضى عنهم، فالله ما راضي عنهم.
بعدين هو المواطن التعبان يريد واحد يخفف عنا لو يطيح حظه بالزايد، يعني قبل فترة اقبال اريد اذكرك قطعت رواتب الموظفين والمعلمين والمدرسين من اهالي نينوى داخلها وخارجها وذبيت كل الصوج على العبادي، بس والله اذا عرف دولة رئيس الوزراء جان طيح حظك، والممثليات رواتبهم متأخرة، عمي يا متأخرة بعضهم ما يستلمون.
وانت ولا داري ما اعرف اتغشم بنفسك لو انت ساذج.
المهم الكارثة الأخيرة اللي يريد وزير التربية تفعليها وتدرون هو بالمقترحات مال سحب الاموال من الفقراء ما شاء الله عليه، القرار الاخير، واتوقع يتبعه قرارات اخرى تضر المواطن. طيب ما هو القرار؟
القرار يقول: تعتزم الوزارة فرض أجور مالية على المراحل الدراسية الابتدائية والمتوسطة والاعدادية؟
كالأتي: المرحلة الابتدائية 500 الف دينار.
المرحلة المتوسطة 750 الف دينار.
المرحلة الأعدادية 1000,000 دينار.
للسنة الواحدة.
سلمللي على الامية بالعراق، يعني الوزراء بعد 30 سنة ما عنده شهادة ابتدائية.
اسولف لو أسكت اوف اوف، راح الشعب يترحم على ايامك صدام حسين ايام التعليم المجاني، لان الجماعة من السرقات افلسوا البلد، وكاموا يدورون دفاتر عتيقة، عمي اقبال مو هيج والله، اكو اكثر من حل عمي بس هالله هالله بالشعب.
العراقي ما يعرف من وين يتلكاها، من اقبال التابع للحزب الاسلامي العراقي والاسلام برئ من تصرفاتهم، لو من عديلة حمود وهم الاسلام برئ من تصرفاتها الحزبية، لو من تسعان الحرامي، لو بهاء الاعرجي، لو صالح المطلك والقائمة تطول.
نرجع لمحمد اقبال الحلو ونقول له:
1. قلل من سيارات موكبك العشرين.
2. مكتبك خلي يقلل من التعيين بالفلوس.
3. ابعد الحرامية من ديوان الوزارة.
4. كافي سفرات للخارج انت ومكتبك.
5. كل واحد يسأل عليك الاربعاء والخميس تطلع مسافر لاربيل، يعني تذاكر السفر عوفها vip.
6. المستشارين قلل منهم.
7. خلي عملك للعراق وليس للحزب الاسلامي، واشك تقدر على هاي السالفة.
ونقاط اخرى كثيرة..
لا تطلع قهر تغييرك بالمساكين والفقراء، واذا ما تراجعت عن قراراتك راح نسولف مع شهد هي تتفاهم وياك.
اتمنى رسالتي وصلت اقبال..