تقاعد؟؟هروب ؟؟؟
مبروك التقاعد عيني عدّولي..مبروك التقاعد عيني عدولي
عشر اسنين مرّن وانته ماتنصاد
مليارات راحن ماأظن تنعاد
لاصدّاد الك بالبوك لا ردّاد
وتاليهه صحت للربع لحكولي
مبروك التقاعد عيني عدولي..مبروك التقاعد عيني عدولي
10 مستشفيات وصفر تاليهه
بغشيشك وصل وانته المعلّيهه
مفتّش عام حاميهه حراميهه
وبحسابك كلت للربع نزلولي
مبروك التقاعد عيني عدولي..مبروك التقاعد عيني عدولي
كل الناس صاحت هاذه لص بغداد
وابو اسراء يرفض شغله كلّه عناد
مليارات راحن علشعب بسعاد
مو مال الشعب ذوله اهلي خلفولي
مبروك التقاعد عيني عدولي..مبروك التقاعد عيني عدولي
صفقات أجهزة مفراس بالبسكوت
أهم شي تغتني وخلي العراقي يموت
مو تمساح عيب انته أكبر حوت
ماظل لا عنز وانبلع الحولي
مبروك التقاعد عيني عدولي..مبروك التقاعد عيني عدولي
ابو اسراء من نفس الحزب لتخاف
غطه يحميك بايام البرد والحاف
حيّه الله الربع يوم الهزيمه اخفاف
ومن نفط العراق الحصّة دزّولي
مبروك التقاعد عيني عدولي..مبروك التقاعد عيني عدولي
ملاحظه للتأريخ:
د.عادل محسن تم تعيينه مفتش عام في وزارة بريمر 2003حين صارت الصحة من حصة الدعوه ...تم فصله من قبل د.علاء العلوان وزير الصحة في زمن وزارة اياد علاوي 2004 فقام بالتشهير بالدكتور العلوان (أشرف وأفضل وزير صحة عملت معه وهو وزير ابن وزير) ..قام السيد الجعفري 2005 بإعادته مفتش عام لوزارة الصحة ...قام السيد المالكي بترفيعه وجعله مفتش عام لجميع الوزارات العراقية اضافة الى عمله في وزارة الصحة 2006..صوّت البرلمان على فصله قبل 3 سنوات ورفض السيد المالكي ذلك كون د.عادل محسن من قيادات الدعوه. تم إختفاء 10 مستشفيات كبيره في مقاولات وهميه إضافة الى صفقات اجهزة مشبوهه تغطي العراق كلّه....تم إكتشاف كونه تزوّج من مسؤولة العقود التي عيّنها هو في وزارة الصحّة ....حكمت المحكمة بإلقاء القبض عليه ...قام السيد المالكي بإحالته على التقاعد وإعلان ذلك في الإعلام بعد هروب د.عادل محسن من العراق.
