في الجمعه الماضيه كنا في شارع المتنبي انا و بعض اصدقائي و كنت احمل بيدي كامرتي فأوقفني هذا الرجل وقال لي :
-عمو انتَ مصور؟
*اي عمو
-وين تشتغل؟
*مصور حر ما اشتغل بفد مؤسسه
-عمو تعرف اني الي أسسلكم جمعية المصورين بالعراق ، تعرف اني الي صَور الملك فيصل يوم تنصيبه ، تعرف اني من اوائل الي دخلو الكامرات بالعراق ، تعرف عندي اكثر من 300 جائزه بالتصوير ، تعرف اني اول من دخل السينما المتنقله بالعراق ، تعرف اني الي حطمت الرقم القياسي برياضة الدراجات و و و و و و
عمو اني محمد امين السعداوي ( كانت كلماته هذه ممزوجه بدموعه النقيه )
الصحفي و المصور و الرياضي ، هسه هذا حالي
مريض و مهمل و محد يسئل عليه ماكو واحد (منهم) دگ بابي فد يوم
( كان كل ردي على كلماته ) *مع الاسف عالزمن
-عمو اريدك توصل صوتي بلكت يلتفولي والله مريض اني
*استاذنا انتَ تاريخ
تاريخ حافل بالابداع فكان الاهمال حليفه
مع الاسف عالزمن..
