" سليمة " إمرأة شريفة وحلوة , بس أرملة وعدهه ولَدين وبنيّة وديج وجم دجاجة . فد يوم كعدت من الصبح ما لكت عدهه فلوس خبز للريوك . دزت إبنها " عبودي " للسوك وانطته الديج , كللتله : روح بيعه وجيبلي فلوسه .
بنص الطريق , ليش ما الديج فَلَت من إيد " عبودي " وشلع وعبر على بيت " أم خالد " ولن " عبودي " فاحت روحه . طار وره الديج وكمز على السياج , ويشوفلك " أم خالد " كاعد يمهه واحد يمصمص بيهه ويمطِّك !
جيَّت عل الديج وكَمَشه . إجه يطلع إندّكت باب الحوش . " أم خالد " كامت إتخَرُّط بخدودهه وتصيح على كيف : سودة بوجهي إجه " أبو خالد " هسه يذبحكم , تعالوا أضمكم بالكنتور . طببتهم بالكنتور وقفلت بابه إعليهم .
وره إشويه ضاج " عبودي " وكلله للرجّال : عمي تشتري الديج ؟ 
الرجّال : يا ديج ؟ 
" عبودي " : هذا الديج .. متشوفه ؟ 
الرجّال : هسه آني بأي حال حتى أشتري ديج ؟ 
" عبودي " : زين عمي على راحتك .. آني راح أطلع من الكنتور ! 
الرجّال : لك دكعد .. إبيش تريده ؟ 
" عبودي " : بمية دولار ! 
الرجّال : هاك المية وجيب الديج .. بس أسكت .
وره إشويه " عبودي " هم ضاج , سأل الرجّال : عمي تبيع الديج ؟
الرجّال : شنو هاي ؟ إستوني إشتريته منك !
" عبودي " : والله عمي آني ما أعرف أبقه كاعد وساكت من دون شغل .. لو تبيع لي الديج لو أطلع .. شنو متكللي شعندي آني كاعد بالكنتور ؟
الرجّال : إبيش تشتريه ؟
" عبودي " : بخمس دولارات .
الرجّال : جيب الخمسة وهاك الديج .
ما أطوّلها إعليكم .. " عبودي " باع الديج عل الرجّال واشتراه منه خمس مرات .. إلى أن طلع " أبو خالد " وإجت " أم خالد " وفتحت إلهم الكنتور وطلعوا منه .
" عبودي " راح لأمه طاير وبيده الديج . لكاهه واكفة بالشارع إباب الحوش تنتظره . إستلمته من بعيد ل " عبودي " كللتله : ولك متكللي وين جنت من الصبح لِسّاه ؟ وجماله .. جايب الديج ويّاك وجاي ؟
كللهه : لتصَيْحين .. هذا الديج وهاي خمسمية دولار !
كللتله : هاي إشلون ولك ؟
ما أطوِّلها إعليكم .. سولف إلهه كل القصة .
" سليمة " شريفة ومتوّكِل جهالها لكمة حرام . كللت ل " عبودي " كوم ولك نروح للشيخ بالجامع نسأله عن الموضوع .. أخذت " عبودي " وراحت . لما وصلوا للجامع كللهه " عبودي " : أكعدي إهنانه إنتظريني خلي أسأل الشيخ وأجي .
دخل " عبودي " عل الشيخ وبيده الديج . كلله : شيخنا هذا الديج .. خطيَّه " عبودي " بعده ما خلّص السؤال .. بس إتنفَّس , وإذا بالشيخ يكل ل " عبودي " : دكوم أنعل أبوك يابو الديج يابو مذهبكم .. من الصبح لهسّاه كال الديج حجه الديج بيع الديج إشتري الديج .. ههي كلب إبن الكلب شنو ماكو غيري بالولاية إمجعِّب لي اليوم من الصبح ؟!