الحجي حمودي (چان مقيم بسوريا و رجع من صارت الاحداث و منتظر فرصة حتى يطفر) صار يومين يعزم ابن اخوه الدكتور تحسين الفلاني (تحسين ابو الليل) ع الفطور و الصدگ تحسين يحترم عمه و ما يرفضله طلب من باب الادب و اللباقة (انهجم بيت البامية) بس الحجي عنده مشكلة وحدة (هي مو مشكلة بس تحسين يعتبرها مشكلة) يطول زيادة عن اللزوم بالصلاة.
الصيام طويل (١٦) ساعة و فوگاها خمسة و تلاثين دقيقة و خمس دقايق تسبيح و دقيقة و ربع دعاء و تحسين يشرب بالمايات و يباوع ع التشريب و ينتظر و يدردم بگلبه "هسه اني مو صليت بساع و فضيتها شدعوة هالتكليف" و "صار نبي براسي ابو التقفيص" و "بصلاة القدر شگد رح يطول .. سنة؟" و غيرها من انواع الگص و النميمة التي يبرع بها المواطن.
اجه العم اخيراً و بدأ الاكل و انطلق الدكتور الفيترچي ياكل لحد الانتفاخ و خلص الفطور و شالو السفرة و اجه الرگي و وراها الجاي و الحوار بدأ بين تحسين و العم :
- حجي ما شاء الله صلاتك كلش مضبوطة ههههه
- شنسوي يا وليدي ما بقالنا شي غير نتقرب من الله .. المفروض انت اول واحد يعذرني و يتفهمني كونك تعلمتها
- اني؟ حجي شگالولك عليه جاي من كندا لو من الحوزة
- ليش انت مو بحزب اسلامي؟ ما علموكم هالسوالف بالحزب؟
- هههههههههههههههه(ضحكة طويلة مصحوبة بگحة) حجي الاحزاب مو مدارس حتى تعلمنا
- لعد (چا) شيگولون؟
- يگولون اذا متدين نساعدك لوجه الله حتى نرفع راية الاسلام
- انت متدين وليدي؟
- أفا حجي اني ما افوت زيارة و رحت للعمرة مرتين (الفيل طار وراه بس ما شافه العم)
- ما شاء الله وليدي الله ينصرك على اعداء الدين منصورين بإذن الله
- تسلم حجي الله يحفظك النا و يديمك فخر للعشيرة يله اني اترخص
- وين بعد وكت؟
- ممنون والله بس اروح امدد و انام تعبناكم اليوم
- تعبك راحة ابن اخويه الله يحرسك الله وياك يا غالي
- في امان الله سلملنا ع الحجية
- يوصل يوصل. في امان الله.
و سمعو صوت الحجية تصيح : وين ابني بعد وكت وين رايح؟
رد عليها تحسين : تعبان والله حجية اعذرونا ع التقصير في امان الله.
طلع تحسين من بيت عمه و صعد سيارته طلع تلفونه و خابر على صاحبته "فوفو" و تواعدو بشقة بزيونة و طربگة للسحور و اتسحر و صار الامساك نام و الظهر رجع لبيته صايم و تعبان و أدى فريضة الصلاة و راح العصر لبيت عمه ويعيد نفس سيناريو اليوم الاول مع اختلاف موضوع الحوار و الاكل مال الفطور.
مقالات اخرى للكاتب
