البارحة مو سولفتلكم على أستاذ جاسم مدير المعهد اللي چنت أداوم بيه وگلتلكم إلتقيت بيه بالصدفة وإستغليت الفرصة وگتله بلكي تشوفلي واسطة من معارفك بالوزارة يعيني وطمعته گتله عندي عشرين ورقة بس تعيني أنطيكياها وهو ضحك عليه وگلي عندي تلث بنات ممتعينات ومستعد أدفع ستين ورقة على كل وحده حتى أعينهن وماكو ؟!
اليوم من الصبح خابرني أستاذ جاسم ، اني كلش كيفت من أتصل وگلت أكيد كسرت خاطره وراح يعيني بالعشرين ورقة اللي مجمعهن ..
عاد رأسا فتحت خط وگتله : هلو حبيبي أستاذ جاسم ، ها بشر لگيتلي تعيين بعشرين ورقة ؟
گال : لا والله بس لگيت تعيين لبنتي بثمانين ورقة واني ماجوه أيدي بس ستين ورقة ، بلكي تدايني العشرين ورقة ملاتك !!
اني من سمعت هيچ رأسا سديت الخط وقفلت تلفوني وعلى أساس خلص شحن ، بس المشكلة خو ماأبقى طول العمر قافل تلفوني من ورا أستاذ جاسم وكروته التعبانة ..
هسه شلون أطلعله بدرب وأملص منه لا ياخذ العشرين ورقة وانوب يخليني أركض ورا فلوسي مو ورا التعيين ..
ساعة السودة الشفتك بيها يا جويسم .
عماد وناس
