البارحة مو سولفتلكم على أستاذ جاسم وگلتلكم خابرني من الصبح گلي دايني العشرين ورقة ملاتك واني رأسا سديت الخط بوجهة وقفلت تلفوني على أساس خلص شحن لحد ماألگالي درب أفلت منه ؟
اني بقيت ساد تلفوني ، والصراحة ملگيت حجة مقنعة أخلص منه بيها ، عاد الساعة ب 12 بالليل فتحت التلفون لأن گلت ممعقولة يخابرني بنص الليل ..
أشو أول مفتحت الخط إجتني رسالة منه ، طلع چان دازلياها من العصر ومن فتحت الموبايل وصلتني ، كاتبلي بالرسالة ( همزين عرفتك على حقيقتك قبل لاأتورط وأسويلك زين ، ولك عماد اني ممحتاج العشرين ورقة ملاتك بس ردت أجربك ، أحب أگلك اني من خابرتك چنت لاگيلك تعيين بعشرين ورقة وردت أفرحك بس بعد اللي سويته لو تموت ماأعينك ) ..
اني من قريت الرسالة تخبلت وكلش تندمت لأن تسرعت وبقيت للصبح منايم وأفكر شلون الغمط السالفة ..
عاد اليوم من الصبح خابرته ، گتله : أستاذ ترا صدگني التلفون خلص شحن والبطارية عاطلة ومتاخذ شحن وهسه إشتريت وحدة جديدة ورأسا خابرتك حتى إعتذر منك ، وگتله : يمعود تدلل صدگ چذب چنك على عشرين ورقة إعتبرهن يمك ..
هو بالبداية گام يجر بظهره ، بس اني إمتصيت غضبه وقنعته وگتله إذا متاخذهن أشگگهن وأذبهن بالزبالة !!
عاد هو رأسا گال : لعد تعالي الساعة بالتسعة يم تربية الكرخ الأولى ، أوگفلي ع الشارع يم ساحة حماد شهاب حتى آخذ منك الفلوس وأفهمك شتجيب متجيب من مستمسكات ..
اني كيفت ولبست هدومي عالسريع وطلعت العشرين ورقة من البقچة وإخذت تكسي وگبل للتربية ..
وگفت هناك ، عاد ورا ساعة طبگ عليه بسيارته ، سلام عليكم السلام ، أنطيته العشرين ورقة وهو رأسا گال : ترا لعبالك هاي الفلوس الي ، هاي للواسطة اللي راح يعينك ..
اني گتله : كلك فلوس أستاذ جاسم ، يمعود أنت متفضل بكل الأحوال ..
عاد رأسا گلي : حضر مستمسكاتك كلها وست صور ووثيقة تخرج وخليهن بفايل وجيبلياهن هنا بنفس هذا المكان يوم الأحد وشخط سيارته وراح ..
اني هستوني درت راسي وأريد أرجع للبيت وچان أشوف ولد صديقي إسمه حسام هم چان ويايه بالمعهد ..
سلام ، عليكم السلام ، بوسة منا وبوسة منا أمواح أمواح ، گلي : ها شعندك هنا ؟!
اني خو ماأگله : أستاذ جاسم توسطلي على تعيين ، لأن هذا هم راح يتصل بيه ويگله على تعيين ويعرس بعرسي واني ماصدگت لگيت واحد يعيني مو أنوب يجيني واحد ويلوص السالفة عليه ..
عاد رأسا گتله : أجيت أسأل على النقل من مدرسة لمدرسة لأن أريد أنقل بنتي ..
وگتله : أنت شتسوي هنا ؟!
گال : اني جاي على هذا القفاص أستاذ جاسم ، أخذ مني تلاثين ورقة على أساس يعيني وصار أربع أشهر يواعدني هنا وميجي ، ومن ذاك اليوم لهل يوم أركض ورا فلوسي وممحصلهن ..
اني من سمعت هيچ رأسا بطني گامت تلويني ورأسا إنعاد شريط ذكرياتي ويه العشرين ورقة ، شلون جمعتهن فلس فلس وشلون چنت ضامهن وفرحان بيهن وشلون طلعتهن من البقچة وحطيتهن بحلگ جويسم ..
عاد رأسا دگيت على أستاذ جاسم طلعلي .. عذرا الرقم الذي طلبته مغلق حاليا أو خارج منطقة التغطية يرجى إعادة المحاولة في وقت لاحق .. توت توت توت ..
وهسه اني گاعد أفكر شلون أطلع فلوسي من أستاذ صخام..
ساعة السودة الشفتك بيها يا جويسم .
عماد وناس
