اكو أطفال يجون بساحة التحرير يبيعون مي ع المتضاهرين ،،، يخلون ابطالة المي بسطل ويفترون يبعون البطل بربع !! واحد منهم شايل السطل على چتافة ويبيع ،، أجة واحد من وراه أخذ بطل مي وطلع گُبَل !!! أكو واحد واگف ع صفحة چان منتبه ع الحالة ،، لحگة ،، وگالة أريد أسألك سؤال ؟؟ أنت عليمن طالع مضاهرات ؟؟
گالة :- غير حتى نغير الفاسدين !!
گالة :- لعد هذا الي سويتة شتسميه ؟؟؟
هذا الشخص إنصدم بعد ميعرف شيجاوب ،، مالگة غير الجواب العراقي المشهور ( ديلة يلة ،، هسة اني شماخذ يمعود ؟؟ قابل وگفت علية ؟؟ )
---
هاي المفاهيم المنتشرة والمشهورة والمتوارثة والي تشكل جزء من ثقافة المجتمع العراقي وبنسبة عالية !!! هي السبب في إنتشار الفساد والفوضى والتخلف والدمار
---
هسة لو تسأل كل العراقيين ع الأطلاق بإختلاف فئاتهم ،، عمال وفلاحين وموضفين ومعلمين وفنانين وأطباء ومحامين وأساتذة جامعات وطلاب ،،،الخ وتگولهم شنو رأيكم بالواقع القائم حالياً ،،، راح يگولولك هذا واقع فاسد ولازم ينصلح ويتغير !!!
بس من ترجع للحقيقة راح تشوف خلاف ذلك !!!
شكم موظف يحچي بالأصلاح والتغيير وهو يعرقل معاملة المواطن حتى ياخذ رشوة أو يقصر بأداء واجبة ؟؟؟
لو المقاول الي يلزم شغل مؤسسات الدولة أو الشوارع والمرافق العامة ،،، يستخدم بالبناء مواد درجة ثالثة أو ثانية حتى تفرقلة بالأرباح ( عبالك مال سايب) لو يعوف الشغل ع النص ويفلت !!!
لو من تگعد الصبح تلگة براس كل فرع كومة مال زبايل يشمروها الناس بالليل !!! ومن تجي تسأل واحد منهم :- يابة انت ليش هيچي دتسوي؟؟
يگولك :- ديلة يمعود هي بقت علية ؟؟ لو يگولك هسة انت صاير وطني براسي .
--
هذا المفهوم صار بمثابة قاعدة ارتكاز أساسية لسلوكيات المجتمع العراقي (طبعاً مو كلهم لاكن أغلبهم) .
--
ترة منظومة الفساد الي موجودة اليوم بالسلطة ،، هاي ماإجتي عن فراغ !! وإنما إنولدت من رحم مجتمع أغلبيتة فاسد !! وإذا نريد نغيرها أو نصلحها ،، لازم نصلح أنفسنا بالأول !! لأن ( ماكو فاسد يصلح فاسد)
Hussein Abu Jaber
