ما أدري هاي صحوة ضمير متأخره لو صحوة أنتخابات مبكره.. يا حنين أنت يا بتاع ..أبو سراوي هذا سيناريو جديد من القشمره لفلم كوميدي بأسلوب غبي راح ينتجه حزب اللغوه بالمرحله الجايه وبدى أعضاء الحزب اللغافه بنشر هاي الثقافه الجديده بين العراقيين مثل الفلاونزا..  وأحنه صرنه مضحكه غسل ولبس, بيد شله لا عدها ذمه ولا ضمير ..بس بشرفك أبو سراوي شنو السالفه كول ولا تخشى شيئا .. هاي لو مسويها كبل سبع سنين جان كلنه لا تخشى شيئا .. يا وله يا ثكيل أنت.. بس وينك هذا فلم شايفيه كبل وطكت روحنه منه مثل فلم الرساله ورابعه العدويه.. وبالمناسبه العراقيين مياكلون شي بايت .. شوفولكم فد شي جديد .. شذكرك اليوم بالفقراء..يا روحي.. طول عمرك, كلبك رهيف وتعشق الشوكولاته ..لا وشوفو الطريقه الجديده , من حق الفقير أن يتجاوز ويسكن عشوائي لان ما عنده سكن يأويه.. يا وله يا أبو الصعاليك أنت يا مفيش حد بيشبهك..

بعد سبع سنين فز من الصبح ,خير اللهم أجعله خير.. طلعت المحاصصه هي سبب البلاوي اللي طيحت حظ الشعب الخايس..شنو هاي الوطنيه أبو سراوي اللي نزلت عليك غفله.. هاي أنت عرفتها وحدك لو أحد كلك ..جاه أحنه صارلنه سبع سنين نلطم علويش ..أمبين أنت مو ويانه ..وراح تبقى مو ويانه . ألعن زمن الغفله اللي جابك ونصبك ريس وزراء العراق .. تعرف أبو سراوي هذا المنصب شكد جبير عليك وميلوكلك..مثل واحد لابس ستره جبيره وميعرف شلون يمشي بيها وأكو واحد واكف براس الشارع أيعفطلك .. المحاصصه يا أبو سراوي خلتك أتصير بهذا المنصب..والنوب يا واحد يحجي ويفك حلكه أيجبحها بالارهاب ويخيسه .. هاي مو عيشه أبو سراوي..أنت عبالك هاي قوه وتاخذ بوش الوادم .. جان كبلك صدام حسين, جان بس أسمه أيخوف دول .. شفته بنص ساعه.. كل قوته وجيشه شلعو.. خو أنت شفته عالطبيعه..وأنصحك أبو سراوي .. متفيدك لا الذهبيه ولا الوصخه ولا سوات , وهذا الشعب اللي تشوفه معفن ودايخ بلكمة عيشه.. تره ضربته أقوى من البركان .. وزمن الدكتاتوريه بح ولى .. وخمطت هوايه وعذبت ناس هوايه وصارت عندك مكابر جماعيه هم هوايه وقسمت هذا البلد ومثل طلبو منك أبو سراوي..
 
شوف أبو سراوي وين رجعتنه.. أنت بكلامك الانتخابي اللي كله سم وحقد راح ترجعنه وبقوه الى أحداث كلش مؤلمه علينه.. ولعنة الله على كل من ينفخ بالرماد حتى يشعل هذا البلد.. ولعنة الله على الجابكم وخلاكم بموقع المسؤوليه.. وساعة السوده على أبو تحسين وهو يضرب الدكتاتوريه ..كلشي بهذا البلد على وشك الانهيار من وراك بو سراوي وره اللي أيشجعك عالفتنه.. شوفو جماعه المالكي كلها كلبت بره.. واللي بقى شوفو وين كاعد وشوفو الحمايه الواكفه تحرسهم .. تلاثتالاف صدري كعدو يم فندق الرشيد خلت المالكي وجلاوزته أيبوكون هوى..وكطعو الشوارع..ولو تشوفون بغداد شلون كئيبه صارت..
وخلي أبشر أبو سراوي..رافع العيساوي وجماعه العراقيه راح تنسحب من الحكومه والبرلمان..وراح أيصير العراق أقاليم..وأنت تصير مثل صخل أجرب محد أيريده..واللي ميعرف تدابيره حنطته تاكل شعيره..ولا تشوف نفسك أكبر من حجمك أبو سراوي..
وما خفي كان أعظم .