عزيزي السُني لا تنسى أنه الرب والنبي والقبله والكتاب الذي يجمعك مع الشيعي واحد،ناهيك عن الواقع المتخلف الواحد،فأثنينكم تفتقدون الراحه والأمان،وأثنينكم خسرتوا أحد أفراد عوائلكم أو أكثر على أيدي الدواعش،وأثنينكم بمناطقكم ناس تعيش ببيوت الحواسم،وأثنينكم يوميه يصادفكم بالشارع ناس عايشه على جمع(قواطي البيبسي)من المزابل...
عزيزي السُني إذا شفت شيعي متعصب وبالنقاش(قافل من الأبي)لا تتعب نفسك وأطلب مِنه إنه على الأقل يعاملك مثل ما كان الأمام علي يعامل الخلفاء..
أكيد أوقات تشوف أخوك بالبيت يقوم بعمل معين انت تعتبره ما مقبول بس هو عكسك تماماً يشوفه مقبول ومع ذلك يبقى أخوك وتحبه وتخاف عليه لذلك مسألة المواكب الحسينية والتشابيه يا بعد روحي يعتبرها أخوانك الشيعه حالها مِن حال العمل المسرحي الفني لتخليد ثورة الأمام الحسين(مع تحفظنا آني وياك على التطرف في بعض الأمور وهذا يتعالج بالكلمة الطيبه الهادفه الصادقه مو بالأستهزاء ولا بالتسقيط ولا بالتجريح..
ها؟جاي تسمع هذا الصوت خارج البيت؟هذا يمكن موكب جاي بشارعكم،أريد منك تروح وتقدملهم ماي ومو شرط ماي أرو أو من التصفيه لأنه الناس خلصوا عمرهم فقر وحرمان من ايام الديكتاتورية لأيام الديمقراطيه فعادي عدهم الشرب من الحنفيه، وبطريقك گوللهم عبارة مأجورين وعظم الله لكم الأجر وشوفلهم الطريق أخاف واحد يريد يأذيهم..
ها حبي وينك شو تأخرت..انطيتهم ماي..شفت اشلون حَبوك وشبكوك....لأنه ناس ما بيهم أذيه على أي أحد وعلى نياتهم....
صدگ....شفت هذا الطفل الحلو إلي يشبه طير الحمام؟...هذا على أساس يمثل دور عبد الله الرضيع إبن الأمام الحسين،بشرفك حتى لو كان كافر مو جريمه يجي افغاني أو شيشاني أو ليبي أو سعودي ويفجره أو يذبحه؟..
صديقي لا تخلي هذوله السياسيين(الخرنكَعيه)يفرقون بيناتنه لأنهُ وداعتك لا يمثلوني ولا يمثلوك وإنما أجوا بساعة جهل طائفيه من انتخبناهم وأكيد نتحمل إحنه الأسباب والنتائج.... 
وحتى ما انسى تره عدنه بعد هواي اخوان من باقي المكونات بالبلد،اما المسيحيين فهذوله طيور حب ولازم نشاركهم مناسباتهم مثل ما يشاركونه مناسباتنا،لذلك بعد كم يوم راح ارمش عليكم بموبايلي(لأنه تعرف اخوك حديقه وما عنده رصيد)ونلبس ملابسنه الجديده حتى نروح نحمي أحتفالاتهم براس السنه ونحيط كنائسهم بأجسامنا أخاف يجي أبن حرام يفجر نفسه بنصهم... 
صديقي...صوت الإعتدال صدگني هو الراح ينتصر بالنهاية وإن قَلْ الناصر والمعين،لأنه حتى بموقع الفيسبوك جاي تشوف أغلب الطائفيين أما متخفين بأسماء وهمية،أو ظامين منشوراتهم بكهوف مغلقه...
إلي يخاف من العصافير ما يزرع إذره،وآني من إلي يزرعون الإذره ومتأكد لابد يجي يوم ونحصد...