أعضاء دولة القولون هم المجتبون المعصومون من الجذب والبوك والنفاق السياسي.. وهم الحفنه المباركه من أصحاب الكهف..قالوا سبعة وثامنهم علي العلاك وبعضهم قال تسعة وعاشرهم حسن السنيد.. ومن يدري قد يكون هناك ملحق يمدد النبوة فيهم, فيجعلهم الحواريون الملازمون لمختار العصر والزمان في ولايته الثالثة.. فضربنا على أذانهم في المنطقة الخضراء عشر سنين , فما قبضنا منهم غير الوعود التي كتبت على قوالب الثلج واللغف الذي لا ينقطع وبث سموم الفتنه والتمزيق.. كبرت كلمة تخرج من أفواههم أن يقولون ألا كذبا.. هؤلاء هم الحواريون الجدد تحسبهم أيقاظا وهم رقود جاثمين على صدورنا.. وكلما أنكلبهم ذات اليمين ونرجعهم ذات اليسار وجبيرهم باسط أيده ورجله ومكوش على كلشي  لو شفتهم وشتميت جيفتهم وقسوة ألسنتهم لوليت منهم وهجيت الى أرض الله الواسعه من رعبهم ونذالتهم..أن خرجوا من المنطقة الخضراء ويه قوات سوات البطله راح يسبون هذا الشعب سباية الحسين أو يعيدونا في بطون أمهاتنه ولن نفلح أبدا.. والجاره شلون وياهم.. قالوا أبنوا عليهم صبات الكونكريت وخلو منفذين وفي كل منفذ سيطره مزوده بجهاز لولبي يعرف متى أشتريت زاهي أو وضعت حشوة أسنان جديده.. جاه هاي السيارات والعبوات المفخخه شلون أدش.. أذن الجماعه كلها متعاونه ولا تستفت فيهم منهم أحدا.. وأصبر نفسك مع الذين يدعون ربهم بالغداة والعشي وحتى حفظنه دعاء كميل وجنه نقراه كل خميس هسه صرنه يوميه ولو تشوفون الوادم ومن كل كلبها تدعي والدموع أيصبن سواجي حتى الله أيخلصنه من هاي الغمه السوده اللي شلون منشوف راح تبقى حتى أيهل علينه حفيد مختار العصر والزمان زينة الحياة الدنيا وهو كاعد على كرسي جده فداه سامي العسكري.. أنا أعتدنا للمعتصمين نار من صدك مو مطاطي أحاطت بهم الفرقه القذره وذوله اللي لابسين أسود بأسود وعصي كهربائيه تشوي الوجوه  ويكول الشعب النتن أبو الفقاعات ماكو كهرباء بئس الشراب وساءت مرتفقا..أن الذين يعملون برفقة مختار العصر والزمان والذين أنكلبو من العراقيه أنا لا نضيع أجر المنقلبين أولائك لهم قصور المنطقة الخضراء مع الاثاث وببدل سنوي رمزي يحلون فيها من أساور من ذهب هاي على حنان الفتلاوي والطبيبه البيطريه المتحوله اللهم أشهد , ويلبسون قاط  ورباط  أصفر وعمايم بيض وسود وحليبي متكئين بسيارات الدفع الرباعي نعم الثواب وحسنت مرتفقا وعلى عناد علاوي.. وأذ قال مختار العصر للعراقيين أسجدوا فسجدوا ألا علاوي كان لوتيا, ففسق عن أمر ولاية الفقيه, أفتتخذون علاوي وقائمته في الانتخابات من دوني وهم لكم عدو مبين بئس للسنة بدلا..وراح يجي اليوم اللي ولي الفقيه أيكول نادوا الناخبين من حزب الدعوه للانتخابات فدعوهم فلم يستجيبوا لهم وجعلنا بينهم موبقا .. وربك الغفور ذو الرحمه لو يؤاخذهم بما سرقوا وقتلوا وهجروا لعجل لهم العذاب بل لهم موعد وين أيروحون لن يجدوا من دونه موئلا.. قال مختار العصر للمطلك فأن تبعتني فلا تسألني عن شئ حتى أحدث لك منه ذكرا..فأنطلقا حتى وصلا ساحة أعتصام الحويجه فأمر قوات سوات فقتلوهم ,  قال أنت سويت مجزره وسفكت الدم, لقد جئت شيئا أمرا.. كله ها مراح تكدر تكمل وياي..كله عفوا أبو سراوي بما نسيت ولا ترهقني من أمري عسرا.. فأنطلقا حتى وجدا مرشحا للانتخابات فقتله بكاتم  كله أقتلت نفسا زكية بغير نفس لقد جئت شيئا نكرا.. كله مو أني كتلك تحالفي وياك مراح أيدوم..كله أن سألتك عن شئ بعدها طلع ملفي الارهابي حتى أروح للسعوديه.. فأنطلقا حتى وصلا أهل قرية كورديه أستطعما أهلها فأبوا ألا أن يضيفوهما فوقع أتفاقيه, فقال لو شئت لاخذت نسبه خمسه بالميه.. كله طز بيك وبتحالفك..بس راح أكلك بتأويل ما لم تستطع عليه صبرا..أني كتلت المعتصمين بساحه الحويجه لان جانت عدهم أجندات خارجيه وياخذون دولارات حتى يبقون بالساحه..وأما المرشح فكان من قائمة علاوي فأردنا أن يبدله بشخص نكدر أنجيبه ويانه مثل البعوره اللي أنشكو وصارو من أنصارنه.. وأما الاتفاقيه مع الكورد فأني مأخذ نسبه كبل كلشي وما أريد يعرف الكورد بيها..ذلك تأويل ما لم تستطع به صبرا..

اللهم لا تدع منهم ديارا.. ولا تبقي لهم أثارا..اللهم طهر بلدي منهم ..اللهم أشف صدور عبادك من المنافقين الدجالين الباحثين عن الشهوة والملذات بفلوس العراقيين..

وما خفي كان أعظم