مرتين رحنه للانتخابات..ومرتين فشلنه في أيجاد من يمثلنه..بالمره الاولى أنتخبت اللي كصصهم مختومه بجعب حذاء 43 أسود بدون قيطان..وبشده فوك الراس بيضه وسوده وبأحجام مختلفه..وجان شعارهم ..نمشي للديمقراطيه ونبني الوطن..وجتي فتوى السيد ..أنتخبو بدون قيطان لانهم أمل الوطن..رحنه مثل الزمايل وطمسنه أصبعنه وكلنه يا معين..وحياتكم من أول أسبوع شدو علينه شده بس الرب في العلى هو الشاهد على ما فعلوه بنه..وبدى السلت ..يا هو أليجي خمط وبعد ما تسمع صوته..يمعودين خلونه نبني الوطن..أثاري الجماعه بنو بيوتهم أولا..الجوع كتلنه..الوادم كامت وين أكو كاع فارغه بنو عليها غرفتين ومطبخ..وين متصير خليها أتصير..وبدت عدنه بناء خلايا مرتزقه تسمي نفسها بالمجاهدين..وجيب ثرم.. تلكي الراس بجفه واللشه بجفه..وكنه بين عمر وعلي..وأشتغل الخطف وفديه.. ناس أكلت خ.. بأثنين أيدها لان متعرف أكل الحرام وظلت عايشه عالراتب..وناس من الفكر صارت وشبعت من الحرام..كل هاي وحكومتنه الرشيده أتباوع وما تتدخل بكلشي لان حايره باللغف..

حلفنه وكلنه هاي هيه بعد لو مو السيد أبو عمامه يجي لو يجي الخزعلي..لافونه بدرب جديد..ذوله المرتزقه أيعرفون شلون يشتغلون على هيجي شعب طايح حظه وميفكر..الدرب الجديد..أذا ما تنتخبون تره السنه حادين سنونهم عالشيعه..وأذا صارو بالسلطه تره حارث الضاري وزلمه ورغد التكريتي أيذبحوكم ويشمرون لحمكم للجلاب..وأنتخينه..أنا غلام أبوي..أحنه أنخلي ذوله النواصب أيصيرون بالسلطه..يا كاع أخذيني وطميني..ومن غبشه الله وكفنه سره أباب مراكز الاقتراع..وفازت الشيعه..وطشينه واهليه وشربت وزعنه..وصار الحكم بيدينه..هسه نجي حتى أنطبق شعارات أهل البيت عليهم السلام بالعداله الاجتماعيه وأظهار الحق..وبعدين نبني وطنه بالتساوي..دخيلك ربي.. الجماعه من أولها حادين سنونهم..يمعودين..وهيه أشتغلت مربعين..مقاولات على حلب أحتياطيات العراق من النفط..وبالشاحنات وبدون عدادات..تفريغ العمله الصعبه من البنوك..بيع وشرى للمناصب الوزاريه والوكلاء..شكد تدفع وتصير نائب..وحتى المجالس المحليه والمحافظين..جاه وين العداله وين التكنوقراط ..يا قراط يا طركاعه..البلد كله صار بيع وشرى..يمعودين تره حزب الدعوه مو هيجي..هذا حزب ناضل وقدم تضحيات..أثاري الجماعه أيريدون أيطلعون المظلوميه مالتهم..يمعودين هذا الشعب العراقي..لعد وين حجيكم من جنتو مرشحين..أنا أبن العراق البار..أولا محافظتي ثم العراق..الجماعه كالو أولا جيبي وبعدين أهلي وطزين بالشعب..الشعب اللي ركص لصدام حسين ميستحق العيش ولا بناء مدرسه ولا حتى مستوصف..أنا أخوك أنغدرنه..وغدر الغادرون..أربع سنوات ذوله باقين..موت يا زمال لمن يجيك الربيع..والتالي شلون..منو أيخلصنه من هاي الورطه..دخيلك ربي..أنكوم من وجعه نوكع بوجعه..وشلون وجعه..غسل ولبس..لا نفطات بقن ولا فلوس خلو..من طركاعه عليكم وعلى اللي جابكم..هاي وين جانت للعراقيين..

كتبنه للسيد أوباما لان هو الراعي الرسمي للعراقيين..بأعتبار العراق مطلع من البند السابع..كال هاي مو شغلتي..التدخل بشؤون الدول الاخرى تجاوز..حلو مشاكلكم بيناتكم..جاه من طبيت علينه مو تدخل..بس من سويتو هوسه العراق..لا أني معليه..صدك من وصلت ألحد أبن عمها وكالت عيب..

ومن أجل ذلك..ما أريد أنتخب هاي المره..وراح أنشر هاي الدعوه لكل أهلي وعشيرتي..لان الجماعه مرتبين كلشي..غمستو أصابعكم ما غمستوها يك حساب..بس أني راح أغمس أصبعي بـ....حزب الدعوه..

وما خفي كان أعظم