كلمن مد اديه ويَّ الحراميه
بريئه منَّه أُمتنه العراقيه
*****
من الراس ابدي تريد يو لمداس
من يفسد الحاكم .. شمَّه من الراس
تلگه ريحته فايحه او كلَّه خياس
والداير مداره كلهه سُفليَّه
**********
اگول او ما أظن هناك استثناء
الشعب يتلوَّه جوع او هُمَّه بستهزاء
الحصّه انباگت اولا كهربا لا ماء
اومن نتظاهر ایگولون بعثيَّه
************
وزاره ابلا وزاره المهم نهب افلوس
شباب الوطن عاطل لو حچه مدسوس
والطالب ابحقَّه جاهل او مهووس
حكومه والحصص سوُّوهه دوريَّه
*************
كفر طفرت احجاره بساحة التحرير
انسل سيف النذاله اوبالبشر تطبير
هَم هذي حكومه ؟ او وين بينه تسير
ابغابه اتگول !! ومسيطره الواويَّه
**********
الوادم بالتظاهر رادوا الإصلاح
چا وین الوعود او وين دمنه الساح
بعد التضحيه تشهر علينه اسلاح
هذا اقبضنه من ثروة النفطيَّه
***********
ابلا مستحه رجعوا او لبسوا زيتوني
هوَّه ثوبكم ، يصرخ لتنسوني
مثلما گبل .. جيتوا اليوم بگتوني
حرامي چان .. شو صرتوا تسعْميَّه..
