{ قُلْ مَنْ حَرَّمَ زِينَةَ اللَّهِ الَّتِي أَخْرَجَ لِعِبَادِهِ وَالطَّيِّبَاتِ مِنَ الرِّزْقِ ۚ-;-} ... قل البرلمان
------------------------------------------------------------------------------------
عمَتْ عين البانيا التنفخ .تذكرت هذا الكلام لامي الله يرحمها ويرحم امهاتكم . جانت تكَوله النه من جان واحدنه يتعيقل وينفخ ريشاته على الفاضي . قبل شهر تقريبا اول ما وكعت البانيا . قالت لي ام منتظر . متجيبلنه كيلو بانيا حتى انسوي ثواب لاهلنا لان بعدها جديده وثوابها واصل .. ولأني اعلم ان سعر البانيا وقتها كان 22 الف فقط . انبرأتُ قائلا . ام منتظر .هي الميزانية منو أقرها اشو البرلمان حاير بالانتخابات والبوكَـ . والعمل كله كساد ومتوقف وفلوس ماكو وشغل ماكو 
ميجوز هسى اغلب الناس متكدر تطبخ بانيا لأن غالية . والامام زين العابدين ع يقول { لا تؤذي جارك برائحة القدر }. المهم اتجبرت المرَه بالله وسكتت . اليوم قالت ابو منتظر ترى هسى البانيا حتى صار بيها دود عاد جيبنه كيلو خلي نطبخه . قلت لها . نعم الان طلبتي حقك . وقالت لا تنسى تجيب وياها كيلو لحم غنم ضلوع وكغم ونص تمن عنبر لأن أهل الوجبة الله لا ينطيهم من { المجارش الى اهل السايلو }تمنهم ما ينوكل . قلت امعوده تدللين . وصار اخوكم ابو جاسم .. 
المهم . كيلو لحم غنم 18 الف . كيلو بانيا 8 الاف . كيلوين طماطه 1500 تمن 3 الف ثوم عدنه بالبيت هههههه المجموع 31.5 واحد وثلاثين الف ونصف فقط لا غيرها سعر كلفة مركَة البانيا ... 
عزيزي الفقير لا تصير ابو جاسم مثلي وتخلي مرتك تشتهي بانيا وتثوب لاهلها . ترى ميزانتك تتخربط وتبقى عوجه شهرين . قل لها سيدتي سمعت ابا هريره يقول . ان هناك حواري في الجنّة تطبخ مركَة بانيا ابو ابوج ما ماكل مثلها .. والصبر جميل