فد سوله بينا كلش محلوه .. بس شحتو المالكي من جحره , تناوشناه سلك ..وطلعنا كل خيسته ..وشكد دورت ( بالكوكل ) عن أنجاز تركه هذا الفاشل والغبي للعراق العظيم والعراقيين الشرفاء طيلة فاجعتين,  ما لكيت , بس أشاره وحده , أنو عين كل كرايبه وجيرانهم , (حصرا بطويريج ) وأنطاهم قطع أراض سكنيه تخبل وغاليه فد نوب , بأخر حياته .. وأتحدى أي عراقي شاف هذا التنبل وجها لوجه , بشارع أو مستشفى أو مطعم , أو حضر فاتحه لواحد من جنودنا البواسل ,ألا وكت الانتخابات واللي فشل بيها فشلا ذريعا , لولا تدخل قوات سوات , وحطت (نعم) بصناديق ضواحي بغداد ( السنيه) , لما فاز هذا المتصابئ ..

البيت العراقي يا حيدر العبادي أساسه هش وكلش ضعيف , وأوتاده واكعه , وبيبانه مخلعه .. عليك بترميم هذا البيت قبل كل شئ ..وأن تعزز الثقه المفقوده وحسن النيه , مع السنه العرب , لانهم شئت أم أبيت جزء من هذا البيت ,ولانك ستقضي على الارهاب بهم ..وحافظ على العلاقه بين الشيعه العرب والاكراد , لانهم وتد جميل يشترك مع أوتاد البيت العراقي , ولا بيت عراقي بدونهم , وبدون التركمان والصابئه والمسيح واليزيديين ,وكل هذه الباقه الرائعه التي تكون العراق..   

أنريد من العبادي , ما طول بعده حار بحار ,أن يكسر هاي الكتل الكونكريتيه اللي حطها أبو نعال .. وعمل فجوات شاسعه بينه وبين شعبه الطيب ..ودفن نفسه بمنطقه ملعونه .. أنريد من العبادي يطلع من هاي المنطقه العفنه.. ويشوف العراقيين عين بعين ..يعرف شيريدون .. أيشاركهم بالمأسي اللي سببها القايد العام للقوات المسلحه ومكتبه العاجز عن معرفة شكد عدد منتسبي قاعدة سبايكر , من جنود وضباط .. وعليك بتشكيل مكتب بيه روح وطنيه من العراقيين العسكريين المهنيين , مو ذوله الدمج , دخيل محمد .. وهم عليك بفريق من المستشارين ويا مكثرهم بهذا البلد الفضيل ..وهم سويلك مره مثلا وشوف المثقفين والمبدعين بشارع المتنبي , حتى لو وره صلاة الظهر , هم ميخالف .. لان يا ريس الوزراء أنت بحاجه الى عين أخرى ترى ما لا يراها مستشاروك .. وشلون أكو محل كبه بشارع المتنبي وحسابك عمي واصل , بس تعال..