بالمجتمعات اللي الله ما غاضب عليها ..وناطيها عقل وتعرف شلون تتصرف ..مو اللي  كاضيتها بس نوح ولطم .. نادر ما تسمع صوت جلاب وبزازين عدهم .. لان هاي الحيوانات عدها حاسه كلش قويه, تشعر أكو أوادم تنزعج من العوي والوكاحه.. فتشوف جلابهم وبزازينهم كلش مؤدبه وميسون وكاحه.. وحتى من يتلاغون ويه بعضهم وميتضاربون بالقنادر ولا بالنعل ولا حتى أيتفلون على بعضهم .. جلاب البره والبزازين وحتى القرود عدهم تربيه من صغرهم مو جايبيهم من الشوارع .. تصورو عد كل واحد منهم جواز سفر بس مو دبلوماسي لا عادي ,وبطاقة سكن .. وميحتاجون بطاقة تموينيه لان الله أمفضل عليهم..  وأكلهم متوفر بالمحلات وبشتى الاصناف وكله أكس باير ومياكلون من بره لو تذبحهم..عود واحد منهم جوعان أفنك تقدمله شيش كباب لو تكه..أبدا ميدنى ويشم .. عمي تربيه كوه خو مو كوه .. جلاب وبزازين أيسمعون الكلام .. ومن ينحصرون أيسون فد حركات مال واحد أيريد يضرط  لو أيخلي أيده على بلبوله.. فيطلعوهم بره أيكملون كلشي ويرجعون للبيت وهمه مقندلين ومنشنشين .. وهاي الحيوانات عدها ضمان صحي وتلقيحات أكو شهريه وأكو سنويه.. بأختصار هاي الحيوانات عايشه عيشه رغد ومتونسات عالاخر.. وأكو دول فزكانه أتسويلهم مهرجانات للعوي والميو واجمل تسريحه وأحلى بزونه.. وهسه أكو فنادق ومطاعم خاصه وميجوز دخول الاوادم بيها .. وعدها زواج متعه ومسيار وهم أكو زواج عادي .. وكبل أسبوع أنتخبو هاي الحيوانات ناطق بأسمهم وأسمه ( أوغي ).. حيوانات عايشه بالنور لان عدها كهرباء وطنيه..ومن تطلع بالشارع متسوي وكاحه وتوكف بالاشاره الحمره ومتمشي ألا أتصير الاشاره خضره , لان داخله دورات تعريفيه.. وعدها شهادات مو مزوره..وهاي الحيوانات وفيه وما تغدر بأصحابها..

عدنه بالعراق العظيم , جلاب وبزازين بس القندره والنعال أيفيد بيهم..عود أنطيهن أكل لو أشربهن مي..طبهن مرض..هو أحنه لاكين أكل حتى أوكل الجلاب والبزازين.. بعدين أكو فتاوى من مرجعيتنه الرشيده أتحرم بقاء هاي الحيوانات بالبيوت لان أحنه أنصلي وهاي نكسه..ولان جلابنه وبزازينه تاكل من الزباله وبالزباله أكو رأس مال واحد خامطيه الجماعه وذابيه بالزبل..وأكو لشه مال واحد مكطعة المليشيات وشامريه وتشوف هاي الحيوانات تمصمص بالكراعين بعظام الرجل ..فتصير مجلوبه..وعمرها متعرف شلون تاكل من القواطي وتلعب نفسها من هذا الاكل..وجلابنه متعرف شنو الاشاره الضوئيه لان ما لحكت عالضوى..بس عدها شهادات وكلها مزوره وأغلبها صادره من دوله مجاوره وصايره خري مري ..ها وجلابنه ما عدها ناطق بأسمها..جان عدها وأبن الجلب هبر هبره جبيره وشلع..لان لو باقي جان هبروه هبر بس عرف الشغله وأنطاها اللهيب..وهسه ظلت بليه ناطق وتعالو وشوفو الهرج والمرج ..وعويهم من الصبح ألحد الليل..ولد الجلاب ميملون وأذا لزمو الميكروفون محد أيهده ألا يعوي ويطرش الوادم..

وعدهم عتوي شلون عتوي مربرب .. هذا خاليه للمصالحه بين الجلاب والبزازين والقروده .. مرات هوايه أتصير عركات وهوسات .. فيجي هذا العتوي المربرب ويصالحهم بس هو يطلع أيردون للهوسه ..هاي شغلته ويهبر كل هبره ويسجل بأسم المصالحه.. بس مو صوجه صوج الجلب الجبير اللي حاطه.. وهسه كلها هايجه الجلاب والبزازين والقروده..علويش محد يدري..والسالفه كلها علمود اللحم..وكل جلب أيريد يهبر هاي اللحمه أله..وبين عو وميو ضاعت اللحمه..

وما خفي كان أعظم