عمي يا أحزابنا الوردة , على كيفكم ويه العبادي .. أنطوه مجال حتى يكدر أينفذ طروحاته في البرنامج الحكومي .. يا معودين , العبادي ما عنده عصى موسى .. لان الخيسه اللي تركها مختار المغرب , بكل مكان , وداشه عرض بطول بينا , وصايره طحالب وسرطانات .. وشلع هاي السرطانات من جذورها , يحتاجلها , جلسات كيمياويه , تنفذ شويه شويه , مو تريدون كلشي بساع .. لان أكو قرارات وقوانين , أتخذها أبو نعال , بعضها ما يكدر العبادي يلغيها , ألا بعد عرضها على مجلس النواب .. وأني متأكد , أن العبادي بالوقت الحالي , مهتم بالجانب الامني وعودة النازحين الى أراضيهم , وهذا مو بالهين يا جماعة .. 

عمي يا أحزابنا الوردة , أتركو كلشي للعبادي , خلوه يتصرف , ولا تضغطون عليه .. تره والله , أذا طبق خطوات برنامجه , حتى لو بالحد الادنى , راح تشوفون الفرق الشاسع بينه , وبين صاحب الصفقات الوهمية وحامي المفسدين .. أكو هوايه قرارات , راح يتخذها العبادي بالايام الجايه , تخص كل شرائح المجتمع العراقي , وأهلنا بالمحافظات اللي طالبت بحقوقها المشروعة .. بس لازم تقابلون حسن النيه , بنيات عملية , ولا تستعجلون , والعجلة من الشيطان ..

عمي يا أحزابنا الوردة , هسه خو كلكم بالحكومة , وفاخت أمينه , ونجاحكم يعني نجاح العراق, ومن ينجح العراق , سياسيا وأقتصاديا وأجتماعيا , يعني راح نقضي على أخطبوط الفساد , وتشجيع الاستثمار , وأيجاد سياسة واضحة للقضاء على الفقر والبطالة , وأهم شي الكهرباء , ونشجع رؤية العبادي , في أخذ دور للقطاع الخاص في التنمية الجديدة .. ويا رب الخير والاستقرار للعراق وللعراقيين , وتره يستاهلون !!