نوري المالكي صار أسدا غضنفرا ويمكن أن يفترس أي شئ يوكف كدامه حتى لو جان الشعب .... وتمكن أبو سراوي خلال ولايتين أن يؤسس أجهزة قمع ومليشيه مهمتها تصفية الخصوم وأشاعة الرعب والهلع في صفوف العراقيين..أبو سراوي مو ذاك الرجل التعبان اللي جان أيخاف ربه..ولا ذاك المعارض اللي جان توصله مساعدات قليله جدا حتى يكدر يدفع أجرة الغرفه في الشام ويكدر أيسد جوعه..نوري المالكي اليوم نسخه جديده من التسلط والتطلع الى الاعلى وعدم أحترام الاخر..واليوم أبو سراوي كومه من الطائفيه اللي بث بذورها ورعاها طيلة الفتره الماضيه وهي ورقه يستخدمها متى يشاء..أبو سراوي أصبح اليوم بلدوزر يكتسح كل شئ وهو مقتنع في قرارة نفسه أنه فشل فشلا ذريعا في أدارة البلد ويرفض أية فكره حتى لو بيها مصلحه للوطن والمواطن ,لان يجد بيها تحديا للمسار والطريق اللي خطته أيران ليمشي بيه العراقيون غصبا على أكبر شارب ووفق تصاميم المرشد الاعلى..
أبو سراوي اليوم يمشي برجله الى نفس الحفره اللي جان خاتل بيها صدام حسين..القضاء بيده والملفين الامني والعسكري والبنك المركزي وخلي أنكول العراق تحت تصرفه..ورئيس الجمهوريه غايب وأكو الخزاعي اللي أينفذ نفس خطه أبو سراوي .. فهو لا يحتاج اليوم ألا على سيطرة كامله للمجالس المحليه ليحافظ على كرسيه.. فتشوفون جلاوزته أيرشون المال والسلاح وأجهزة التبريد ويوزعون الاراضي على العشاير المعفنه اللي شبعت ركص وجيلات بوكت صدام وتعيد اليوم نفس الجالغي وبنفس اللسان اللي جان أيهوس للطاغيه ..وعدنان الاسدي يوعز للاجهزه الامنيه بوضع صح على( أوصيكم بالعراق ) وألا الويل والثبور لكل أفاك أثيم ..وعامر الخزاعي يدهن الناس اللي عدها شهداء وسجناء سياسيين بعشرة مليون وهذا سعر العراقي اللي ضحى وناضل حتى هيجي شكولات تتصدق على عوائلهم ..وكل قايد فرقه ولواء أبوه ينسلك أذا ما صوت جنوده وضباطه للمالكي..خلي أكول فرد كلمه..يعني تصويت 650 ألف منتسب من الاجهزه الامنيه راح أتكون لصالح أبو سراوي..
اليوم نوري المالكي يعتقد جازما أذا ما سقط بشار الاسد, سيكون عرشه مهتزا ومهددا أيضا ,وربما يثور الشعب العراقي النايم في أية لحظه ضد الظلم والاضطهاد بعدما خسر أبو سراوي المرجعيه وتحالفاته مع الاحزاب المشاركه في العمليه السياسيه وجمهور واسع صوت له في الانتخابات الماضيه..أبو سراوي يعتقد بالخوف ونشر الرعب والاموال يكدر أيسيطر على عقول العراقيين..ويريد أيحصل على 99,99 بالميه من الاصوات.. بس ميدري هذا الوكت راح.. وميكدر لا المالكي ولا غيره أيسيطرون على هذا الشعب اللي بس ينطي ومن أيريد أيطالب بحقه أيصير أرهابي ..عشر سنوات مرت أبو سراوي شنو اللي قدمته للشعب العفطي..أنت دمرت بينه وطنيه العراقي وشطرتها شضايه.. وخليت ناس حقيره تصعد فوك فوك ونزلت الناس الطيبه أسفل السافلين .. أحنه أنحس يا أبو سراوي عدكم أنفصام بشخصياتكم .. سبحان الله كل أعضاء دولة القولون واحد تافل بحلك الثاني ونفس الروح الخبيثه أيحملون ..وهمهم شلون أطيحون حظ هذا الشعب أكثر مما هو طايح حظه ..مثل واحد أيريد ياخذ ثار من هذا الشعب .. عبالك أكو سياسه ممنهجه حتى أيخلون هذا العراقي دايخ وميعرف شنو أيسوي .. أتشوف بمكتب أبو سراوي عدد جبير من البعثيه اللي جانو أمطيحين حظ الشعب بالماضي ويرجعهم بأستثناء ..بوزارة الدفاع من محمد العسكري وكنبر وعلي غيدان وقاسم عطا وأنت نازل..بوزارة الداخليه أعداد كلش جبيره من القتله البعثيين تاخذ مناصب حساسه..ومن تسمع أبو سراوي تتعجب وهو أيردد القوانه المشروخه لا مكان للبعث الويل كل الويل لقتلة العراقيين ..هذا شيسموه أبو سراوي.. ويروح ويكطع الشوارع ويفصل مناطق بغداد بكتل كونكريتيه ويزيد السيطرات اللي تسخر من العراقيين وتطمس كرامتهم الباقيه منها بس كلش شويه ..وتشوف يوميه أعتقالات بالجمله وأعدامات من وره المخبر السرسري..والله حرام أيصير بينه هالشكل. 
مبروك للدكتاتور الجديد أبو سراوي فوزه الكاسح في أنتخابات المجالس المحليه..
وما خفي كان أعظم