ديرو بالكم يا عراقيين نوري المالكي اليوم راح يكلب..بس مكال يمنى لو يسرى.. عالي لو ناصي ..خليه يكلب أذا هو شريف ووطني ..تره أبو سراوي بس بوخه لا تصدكون أيسوي شي ..وهاي طبيعته يرعد ويبرق وبعدين يمطر مطر خفيف كلش خفيف واللي أيشوف الغيمه أيكول بوياي راح تمطر كلش قوي ..خلي أيروح أيداوي بوكات جماعته وحمايته للحراميه وبعدين يكلبها ..لا وهو بقى شي يا أبو سراوي حتى أدكلبه..أي مو أنت كالب البلد عالبطانه.. وريحته المعفنه سبت الدنيه .. راح تشوفون ريس وزراء العراق وهو خايف ومرعوب ويحرك أيده كل شويه ويباوع بعيونه على الكاعدين بالغرفه .. خرب بعفلق لو تشوفون أبو سراوي شلون مضطرب وعصبي وبعد شويه أيسجل كول لو ما أنكطعت الكهرباء والمي كام ينزل من أبطه مثل الشلال ويرجف وهو يتوعد وكام أيصيح دثروني دثروني..

هاي سمعناها كبل أربع سنين أبو سراوي..تره أنت صرت عتيك.. مو أنت أبو الملفات اللي راح يكشفها وراح يلعب جوله..أشو بعد يومين فشيت وطببت راسك بالخيسه.. أحنه تعلمنه عليك وعلى فيكاتك أبو سراوي.. بس أذا أنت جدك أبو المحاسن اللي جان نايب عريف بجيش الامام.. وصدك أدكول أني عراقي وأيدي نظيفه ويخسى اللي أيكول علي حرامي..تنطي كل واحد حقه من اللي جهز وأسرج وقتل وهجر ونهب العراق والعراقيين وكدام الشعب .. وراح أتشوف شلون راح نكلبها سويه .. ونكول الى الامام أبو سراوي ولا تخشى شيئا..

وأحنه نخشى يا أبو سراوي أن تكون بس ترعد وماكو قبض وتخجلنه.. تره شوف كلنه نكلب عليك.. أي لان هاي الشغله ما بيها صاحب صديج يا أبو سراوي..وأخافك تكلب علينه وتسوي مذابح بعد أكثر..خلونه أنشوف اللقاء ولكل حادث حديث..بس أحنه نعرف أبو سراوي بس بوخه..نفسي أصدك ولو مره.. شتكولون يا جماعه راح يكلب الجدر وناكل مقلوبه..