تره يا جماعه هاي أربع سنين يعني ميفيد الندم ولا عض الاصابع.. علينه أن لا نكرر الفواجع.. عدنه بعد هوايه وقت.. خلونه نسمع ونعرف منو بيه خير ويحب هذا الوطن اللي أبتلى بالمالكي وعلاوي والحكيم.. كل مرشح سابق أبعدوه من بالكم..ولا تلدغون مره ثانيه.. ولا تسمعون اللي يضغط عليكم ويحاول يرشيكم ويغريكم.. لان هذا اليرشي هسه راح أيبيعك باجر مثل ما باعونه اللي كاعدين على الكراسي وخايفين من أصابعكم ..حتى المرجعيه أدكول لا ترشحون اللي سرق وقتل وهجر واللي دفع فلوسكم في طبع بوسترات دعايته.. معقوله هذا العراق الجميل ما بيه بس الحراميه والمافيات واللي مصو دمنه.. لازم أكو وطنيين حبوبيين ما يهمهم الكراسي والسلطه بقدر ما يهمهم الوطن والمواطن..

شوفو الجعفري وهو هم حجي من ربع أبو سراوي شيكول..ميزانية العراق تفوق خمس ميزانيات دول وسكان العراق أقل من ربع سكان هاي الدول الخمس..بس روحو شوفو الفقر والمرض والناس التعبانه من وره سرقة الاموال العامه وأختفاء المليارات بصفقات وهميه..تعرفون يا جماعه أكو ناس تشرب مي المجاري وناس تاكل من الزباله والحشرات معشعشه بشعرهم وأجسادهم والكهرباء بعيده عليهم.. وشايفين بشر عراقيين أينامون بالحدائق والمكابر والشوارع لان ما عدهم ولا شبر بهاي الارض العراقيه.. تعرفون أكو منظمات أجراميه تاخذ أطفال العراق الى دول أخرى وتربيهم حتى أيصيرو مرتزقه في حروب مستقبليه.. سامعين بالعراق أكو حيوانات بشريه تسرق أعضاء جسم الانسان العراقي وتبيعها الى أخرين.. تعرفون أن العراق صار من البلدان اللي تعبر من خلاله أنواع المخدرات وحبوب الهلوسه اللي جاي تنتشر بوسط وجنوب العراق.. سامعين أكو ولحد الان مخابرات دوليه أجند عراقيين تعبانين وتغريهم بالاموال حتى أيقومون بأعمال عدائيه ضد العراق والعراقيين..

والكل سمع عن أختفاء 700 مليون دينار في كربلاء وكل عضو مجلس يشمر السالفه على الثاني وضاعت بين حانه ومانه..وأكيد عرفتو سالفة 60 مليار دينار اللي أختفت فجاءة من محافظ النجف..يا جماعة الخير هاي المليارات شلون تختفي هم هذا تماس كهربائي..لو حرامي حط هاي الفلوس بجيبه وطلع..هذا أيدل على أن حكومة المالكي ضعيفه وتشجع السراق ومتحاسبهم لان لو أكو رادع قانوني مجان أحد باك فلس واحد بس هيه تايها ومحد ميدري بالثاني..ومن أجل هذا أنكول يا عراقيين ديرو بالكم من تنتخبون..ولا تنسون ذوله الجياف وأنسوهم مثل ما نسوكم..

أكو مناطق يا عراقيين بالبصره اللي تسبح بالنفط وهيه عبالك بالقرن الخامس عشر..لا خدمات ولا كهرباء ومي مالح حتى الحيوان ميشربه ولا وسائل صحيه ولا رعايه أجتماعيه ومحد من ذوله البعوره اللي أيسمون نفسهم مسؤولين كلف نفسه وشاف هاي العوائل اللي بس الله أيكون بعونهم.. وبوكت الانتخابات أتشوفهم مثل الزنابير وينطون وعود حقيره بتحسين أحوال هاي الناس اللي ملت من جذبهم.. وتسمع الجعفري والمالكي والحكيم وهمه أيجذبون على شعبهم ويسون مناطقهم كمره وربيع ومن تنتهي الانتخابات ويسرقون أصوات الناس الطيبه تختفي هاي الامنيات ويه أختفاء المليارات ..

ومن أجل هذا..علينه أن نتذكر دائما الاربع سنين اللي مرن..وعلينه أن منصير قشامر وجسر تعبر هاي الاحزاب اللي تضحك على عقولنه ومستقبلنه..وللعلم كل البرامج الانتخابيه جذبه..ولو تقرونها هيه كلها متشابهه ومستنسخه بنفس الطابعه.. هاي فرصتنه أن نخلي كل جذاب بجيس زباله ونرميه بره..والله يحفظ العراق والعراقيين..

وما خفي كان أعظم