ابو علي المندلاوي جيرانه..

عضو فرقة محترم ويلبس زيتوني وعنده برازيلي زركه موديل 83

اتحررت الفاو يوم 17 نيسان 1988..

والناس صايمه وكبل كلها تلتم ونفطر بالحديقة لو بالطرمة مال البيت ،هذا خله المنطقة كلها خاتله وتدعي عليه ...

بس من يحجي ويسكت فرحة الرفيق ...!!!

اتنكب بكلاشنكوف روسية ما مدشنه واستلم السمه ربد ،ايخلص مشط ايوكله الثاني لحد مافاخ ..

ابوعلي من عام 2003 لليوم مواظب على كل المناسبات الدينية ويندد بالتيارات الوطنية والليبرالية ..

كل اسبوع ايطش مغاويره بالشارع شي اتوزع مي وشي اتوزع شربت ومن تحمه حيل عنده ايسوي ثواب فاصولية وتمن عنبر..

كلما اشوفه أذكره بفرحت الفاو...

يضحك ويزحف ليغاد مني .

هو يحجي عربي مفلش 

ايكول لاماكو هيج...بعدين يختمها

والله انتي عندج سوالف وليده ماتكعدين راحة.

ومازال ابو علي المندولاي صديقي الذي اقطع مسافات الشوق من اجله ،رجلاً قارب السبعين من عمره اجالسه مثل رواية الطفولة والفرارات واستكشاف الدرابين التي وطأتها قدمي.

نتمنى له الصحة والعافية .