كولولي أذا أكو خطأ بالموضوع ..الكورد مو جزء من الشعب العراقي الطايح حظه..والنفط العراقي مو للمصخمين العراقيين..ألف عافيه أذا الكورد ياخذون النفط ويبنون بيه كردستان العراق .. مو أحسن ميوزع نفطنه أبو سراوي هدايه  لمصر والاردن .. عالاقل ذوله شعبنه ويستاهلون .. وياما هذا الجزء من العراق الجايف هرب صخوله وأغلب الجحوشه في حكومة الديمقراطي أبو سراوي من ظلم الطاغيه السابق رحمة الله عليه وعلى عناد الحجي ..وأتمنى على أبو سراوي أيروح سياحه وبضيافة أهلنه بالشمال , مو مال يوم واحد , لا, حتى أيشوف بعينه ويمشي برجله .. أني متأكد راح أيشوف ناطحات السحاب ورافعات الانشاء وهي تمتد في الافق ..مدن جديده بكردستان تنبني ..مؤسسات صحيه أنشأت ..كليات بكل الاختصاصات ..مي طيب تحسه مينه كبل ..كهاوي ومطاعم وفنادق تشعر بالفخر أكو جزء من أرضك حلو بالرغم أن العراق هسه ما بيه شي حلو كله عفونه وخيسه..

 جنت أشوف جماعة التحالف الكوردستاني بالبرلمان ليش  يتكاتلون عالموازنه أثاري مو من بلاش.. وحتى لو أيحطون بجيوبهم, هم ميخالف , بس تشوف يا أبو سراوي وجوه الناس وهيه مطمئنه متحس بخوف ..ناس للصبح تتمشى بالشوارع لان أكو كهرباء على مدار الساعه.. شوارع ما بيها سيطرات وعريضه ونظيفه.. حتى الهوى غير شكل ..تصور يا أبو سراوي, محافظ أربيل يكعد بالكهوه ويسلم عالناس وياخذون وياه صور للذكرى .. طبعا أنت يا أبو سراوي تعرف محافظنه صلاح عبد الرزاق ..أسأل أي بغدادي , يعرف محافظنه منو.. شايفيه بالشارع .. لا ..شلون صار محافظ  محد يدري .. أحلى شي بمحافظات العراق الشماليه متشوف سايبا وسمند وهاي السكراب..وين متروح أجرة التاكسي تلاثة ألاف دينار ..بطاله أكو بس كلش قليل قياسا بنفوس أربيل بحدود مليون ونص..أتشوف أنشاء طرق سريعه ومدارس وبنى تحتيه تفرح بيها وأني متأكد راح أتصير عندك فكره واضحه وتنقلها للعاصمه..لازم أتعمرون بلدنه وكافي عرك..لازم تفضون مشاكلكم بيناتكم..أحنه مو طرف بالهوسه مالتكم..   

والله طكت رواحنه وأحنه نباوع على هذا الشعب المسلوب الاراده وعلى بلد بعدله شويه أيضيع ويضيعنه وياه هاي أذا ما ضيعنه أبو سراوي..عشر سنين وأحنه أنكول خلي نشوف بلكي باجر أيصير أحسن..النوب أنشوف الانكس ..عشر سنين وأحنه نشوف أموال العراق تتحلل وتتفسخ وتروح بجنط  ببنوك الخليج وأوربا .. والطامه الكبرى من تسمع أن أمريكا صرفت عالعراق 60 مليار دولار وراح تعبها هباءا منثورا!! قوات الاحتلال أنطت هاي الدولارات للجماعه علمود أيحسنون بيها الكهرباء والمي والنفط .. صارت بيدهم وأتبخرت.. يا عراقيين شايفين واحد زمال أبن زمال أيضيع 60 مليار دولار.. ومن تصير لجنه حتى أيعرفون وين راحت.. جماعه الطمغه عالكصه أيسون عليها ,عمليات تمييع وبحيل ما تخطر على بال واحد..ويطلعون همه أهل الشرف, والامريكان همه الحراميه !! عشر سنين وأحنه ننتظر من الحفلك السياسيين أن يتفقون بيناتهم حتى يبنون دوله ويشوفون هذا الشعب اللي أنسمط أبو أبوه.. بس همه كاضيها مص وحلب وأخمط وأطلع..والله عيب عليكم..وهنا أوجه دعوة لكل الصخوله سواء جانو بالبرلمان لو بالحكومه المعفنه.. روحو شوفو كردستان العراق شلون جانت وشلون صارت..
وما خفي كان أعظم